ജന്മഭൂമി പ്രസാധകനെ വധിക്കാന്‍ ശ്രമം: പത്ത് സിപിഎം പ്രവര്‍ത്തകര്‍ അറസ്റ്റില്‍

തലശ്ശേരി: ആര്‍എസ്എസ് കണ്ണൂര്‍ വിഭാഗ് കാര്യവാഹും ജന്മഭൂമി കണ്ണൂര്‍ എഡിഷന്‍ പ്രസാധകനുമായ വി.ശശിധരനെ വധിക്കാന്‍ ശ്രമിച്ച പത്ത് സിപിഎം പ്രവര്‍ത്തകര്‍ അറസ്റ്റില്‍. അക്രമിസംഘത്തിലെ ഒരു സിപിഎം പ്രവര്‍ത്തകനെ ആയുധസഹിതം സംഭവ സ്ഥലത്ത് തന്നെ നാട്ടുകാര്‍ പിടികൂടി പോലീസില്‍ എല്‍പ്പിച്ചു.

ബൈക്കുകളില്‍ രക്ഷപ്പെട്ട പ്രതികളായ മറ്റുളളവരെ പിന്നീട് പോലീസ് അറസ്റ്റ് ചെയ്യുകയായിരുന്നു. ശനിയാഴ്ച രാത്രി പതിനൊന്നരയോടെ കതിരൂര്‍ ഡയമണ്ട്മുക്കില്‍ വെച്ചായിരുന്നു ആക്രമണം.

വി. ശശിധരനും കൂടെയുണ്ടായിരുന്ന രണ്ട് പ്രവര്‍ത്തകരും ബഹളം വെച്ചതിനെ തുടര്‍ന്ന് അക്രമികളില്‍ ഒരാളൊഴികെ മറ്റെല്ലാവരും ബൈക്കില്‍ രക്ഷപ്പെടുകയായിരുന്നു. സിപിഎം പ്രവര്‍ത്തകനായ ഷിജില്‍ (23)എന്ന ഷിജിയെയാണ് സംഭവസ്ഥലത്ത് നിന്ന് ആയുധങ്ങള്‍ സഹിതം നാട്ടുകാര്‍ പിടികൂടി പോലീസില്‍ ഏല്‍പ്പിച്ചത്.

ബൈക്കില്‍ രക്ഷപ്പെട്ട എരുവട്ടി സ്വദേശികളായ ജിഷ്ണു (19), അനഘ് (20), വിഷ്ണു (19), സനീഷ് (21), അഖില്‍ (21), ശബരീഷ് (19), ഷഫീര്‍ (21), രാഹുല്‍ (22), സച്ചിന്‍ (20) എന്നിവരെ കൂത്തുപറമ്പ് സിഐ യു.പ്രേമന്റെ നേതൃത്വത്തിലുളള പോലീസ് പിന്നീട് അറസ്റ്റ് ചെയ്തു. പ്രതികളെ ജാമ്യത്തില്‍ വിട്ടയച്ചു.

ആര്‍എസ്എസ് ജില്ലാ ശാരീരിക് ശിക്ഷണ്‍ പ്രമുഖായിരുന്ന കതിരൂര്‍ മനോജ് വധക്കേസിലെ പരാതിക്കാരനും ഒന്നാം സാക്ഷിയുമായ വി. ശശിധരനെ അപായപ്പെടുത്താന്‍ സിപിഎം നേതൃത്വം ആസൂത്രണം ചെയ്ത ആക്രമണമെന്നാണ് സൂചന.

പ്രതികളെ പോലീസും സിപിഎം നേതൃത്വവും സംരക്ഷിക്കാന്‍ ശ്രമിക്കുകയാണെന്ന് ബിജെപി നേതാക്കള്‍ ആരോപിച്ചു.

പിടികൂടിയവരില്‍ നിന്നും ആയുധങ്ങള്‍ കണ്ടെത്തിയെങ്കിലും അതു മാറ്റുകയായിരുന്നു. സംഭവം നിസാരവല്‍ക്കരിക്കാന്‍ പോലീസ് നടത്തിയ നീക്കം പ്രതിഷേധാര്‍ഹമാണ്. കണ്ണൂരിലെ സമാധാന ശ്രമങ്ങള്‍ക്ക് ഭീഷണിയാകുന്ന നിലപാടാണ് പോലീസിന്റെ ഭാഗത്തു നിന്നുമുണ്ടായത്.

പ്രതികളെ സ്‌റ്റേഷന്‍ ജാമ്യത്തില്‍ വിട്ടത് ദുരൂഹമാണെന്നും സമഗ്രാന്വേഷണം നടത്തണമെന്നും ബിജെപി ജില്ലാ പ്രസിഡണ്ട് പി.സത്യപ്രകാശ് ആവശ്യപ്പെട്ടു.