കൊച്ചി: ആദ്യ ഭാര്യയുടെ മരണശേഷം രണ്ട് സ്ത്രീകളെ വിവാഹം ചെയ്ത് തട്ടിപ്പ് നടത്തിയതിനുശേഷം വീണ്ടും വിവാഹതട്ടിപ്പ് നടത്താന് ഇന്റര്നെറ്റ് മാട്രിമോണിയല് വെബ്സൈറ്റില് പേര് രജിസ്റ്റര് ചെയ്തയാളെ തൃക്കാക്കര പോലീസ് അറസ്റ്റ് ചെയ്തു.
വയനാട് സുല്ത്താന്ബത്തേരി ചീരാല് ഭാഗത്ത് അമരമ്പത്ത് വീട്ടില് തമ്പു ചെട്ടിയുടെ മകന് സുരേഷ് ബാബു (44)വിനെയാണ് അറസ്റ്റ് ചെയ്തത്. ആദ്യഭാര്യയുടെ മരണശേഷം 2011 മെയില് ഗവണ്മെന്റ് ജീവനക്കാരിയെ വിവാഹം െചയ്ത പ്രതി പണവും സ്വര്ണവും തട്ടിയെടുത്തതിനുശേഷം പീഡിപ്പിച്ചതിന്റെ പേരില് പ്രതിക്കെതിരെ 2013ല് തൃക്കാക്കര പോലീസ്സ്റ്റേഷനില്തന്നെ കേസ് നിലവിലുണ്ടായിരുന്നു. ഇതിനിടെയാണ് വിവാഹപരസ്യം വഴി ബംഗളൂരുവിലുള്ള പ്രമുഖ ഐടി കമ്പനി ഉദ്യോഗസ്ഥയായ സ്ത്രീയെ പരിചയപ്പെട്ട് വിവാഹം കഴിച്ച് പണവും സ്വര്ണവും കബളിപ്പിച്ചെടുത്തത്. സ്ത്രീയുടെ പരാതിയില് കേസെടുത്ത് പ്രതിയെ അറസ്റ്റ് ചെയ്യുകയായിരുന്നു. മുമ്പ് നടന്ന വിവാഹം മറച്ചുവച്ചാണ് ഇയാള് ഐടി കമ്പനിക്കാരിയെ വിവാഹം ചെയ്തത്.
തുടര്ന്ന് വിവാഹത്തട്ടിപ്പ് നടത്തുന്നതിനായി ഇന്റര്നെറ്റില് മാട്രിമോണിയല് വെബ്സെറ്റില് രജിസ്റ്റര് ചെയ്ത് യുവതികളെ അന്വേഷിച്ചുകൊണ്ടിരിക്കെയാണ് പ്രതിയെ പോലീസ് അറസ്റ്റ് ചെയ്തത്. ഇയാള്ക്ക് ആദ്യവിവാഹത്തില് 20ഉം 18ഉം വയസായ ആണ്കുട്ടികളുണ്ട്. ബന്ധുക്കളും സഹോദരങ്ങളും അറിഞ്ഞുകൊണ്ടാണ് തട്ടിപ്പ് നടത്തിയിട്ടുള്ളതെന്ന് അന്വേഷണത്തില് അറിയാന് കഴിഞ്ഞതായി പോലീസ് പറഞ്ഞു. കോടതിയില് ഹാജരാക്കിയ പ്രതിക്ക് ജാമ്യമനുവദിച്ചു. തൃക്കാക്കര അസി. കമ്മീഷണര് സേവ്യ സെബാസ്റ്റിയന്റെ നിര്ദേശപ്രകാരം ഇന്സ്പെക്ടര് സാജന് സേവ്യറിന്റെ നേതൃത്വത്തില് തൃക്കാക്കര എസ് ജോസി, എഎസ്ഐ ബോബന് എന്നിവര് ചേര്ന്നാണ് പ്രതിയെ അറസ്റ്റ് ചെയ്തത്.
