ന്യൂദല്ഹി: രാജ്യത്തെ ഇന്റര്നെറ്റിന്റെ വേഗത കൂട്ടുന്നതിന് ഉപഗ്രഹങ്ങളുമായി ഐഎസ്ആര്ഒ. ഇതിന്റെ ഭാഗമായി അടുത്ത 18 മാസത്തിനുള്ളില് മൂന്ന് ഉപഗ്രഹങ്ങള് വിക്ഷേപിക്കുന്നതിനാണ് ഐഎസ്ആര്ഒ പദ്ധതിയിട്ടിരിക്കുന്നത്. ജിസാറ്റ്-19, ജിസാറ്റ്-11, ജിസാറ്റ്-20 എന്നീ ആശയവിനിമയ ഉപഗ്രഹങ്ങളാണ് വിക്ഷേപിക്കുന്നത്.
ജിസാറ്റ്-19 ജൂണ് മാസത്തില് വിക്ഷേപിക്കാനാണ് പദ്ധതിയിട്ടിരിക്കുന്നത്. ജിഎസ്എല്വി-എംകെ 3 ഉപയോഗിച്ചായിരിക്കും ജിസാറ്റിന്റെ വിക്ഷേപണം.
ആശവിനിമയത്തിനുള്ള ശേഷി കൂടിയ ഉപഗ്രഹങ്ങളുടെ വിക്ഷേപണത്തിനുള്ള തുടക്കമായിരിക്കും ജിസാറ്റ്-19 എന്നും ഒരു പുതിയ ഉപഗ്രഹ തലമുറ തന്നെ ഇത് സൃഷ്ടിക്കുമെന്നും ഐഎസ്ആര്ഒയുടെ അഹമ്മദാബാദിലുള്ള സ്പേസ് ആപ്ലിക്കേഷന് സെന്റര് ഡയറക്ടര് തപന് മിശ്ര പറഞ്ഞു.
ആശയവിനിമയ രംഗത്ത് ഇപ്പോള് തന്നെ വലിയ മാറ്റമാണ് ഉണ്ടായിരിക്കുന്നത്. ഓഡിയോ, വീഡിയോ ഫയലുകള് മൊബൈലില് ഇന്റര്നെറ്റ് വഴി കാണാനാകും. ഉയര്ന്ന ശേഷിയുള്ള ഇന്റര്നെറ്റ് വഴി ടെലിവിഷന് പോലും തടസ്സങ്ങളില്ലാതെ കാണാനുള്ള സൗകര്യം ഉണ്ടാകുമെന്നും മിശ്ര കുട്ടിച്ചേര്ത്തു.
