തിരുവനന്തപുരം: എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനെതിരെ വീണ്ടും വി.എസ്. അച്യുതാനന്ദന്. മൈക്രോ ഫിനാന്സ് തട്ടിപ്പു കേസ് അന്വേഷിക്കാന് പ്രത്യേകസംഘം വേണമെന്ന് വിഎസ് ആവശ്യപ്പെട്ടു. നിയമസഭയില് സബ്മിഷനിലൂടെയാണ് വി എസ് ആവശ്യം ഉന്നയിച്ചത്.
വെള്ളാപ്പള്ളിക്കെതിരായ അന്വേഷണം ഇഴയുകയാണ്. പാവപ്പെട്ട ഈഴവ സ്ത്രീകളെ വഞ്ചിച്ച് കോടിക്കണക്കിന് രൂപ തട്ടിയെടുത്തതെന്ന ആരോപണം വിഎസ് ആവര്ത്തിച്ചു. ഇതിനെതിരെ ആവശ്യമായ നടപടി സ്വീകരിക്കാന് പ്രത്യേക അന്വേഷണസംഘത്തെ നിയോഗിക്കണമെന്നും വിഎസ് ആവശ്യപ്പെട്ടു.
നിലവില് വിവിധ സ്റ്റേഷനുകളിലായി രജിസ്റ്റര് ചെയ്ത കേസുകളില് അന്വേഷണം പുരോഗമിക്കുകയാണെന്ന് മുഖ്യമന്ത്രി പിണറായി വിജയന് സഭയെ അറിയിച്ചു. കൂടാതെ ക്രൈംബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗവും അന്വേഷിക്കുന്നുണ്ട്. ആവശ്യമെങ്കില് പ്രത്യേക അന്വേഷണസംഘത്തെ നിയോഗിക്കും. നിലവിലെ അന്വേഷണം മന്ദഗതിയിലാണെന്ന ആരോപണവും അന്വേഷിക്കും. വെള്ളാപ്പള്ളി അടക്കം നാലുപേര്ക്കെതിരെയാണ് തിരുവനന്തപുരം വിജിലന്സ് കോടതിയുടെ നിര്ദേശാനുസരണം കേസെടുത്തതെന്നും മുഖ്യമന്ത്രി പറഞ്ഞു.
യോഗം പ്രസിഡന്റ് ഡോ എം.എന്. സോമന്, മൈക്രോഫിനാന്സ് കോ-ഓര്ഡിനേറ്റര് കെ.കെ. മഹേശന്, പിന്നാക്ക ക്ഷേമ കോര്പ്പറേഷന് മുന് എംഡി എന്. നജീബ് എന്നിവര്ക്കെതിരെയാണ് അന്വേഷണം നടക്കുന്നത്. വി എസ് നല്കിയ ഹര്ജി പരിഗണിച്ചാണ് കോടതി അന്വേഷണത്തിന് ഉത്തരവിട്ടത്.
