കവരത്തി: രണ്ടുവര്ഷത്തിനുള്ളില് ലക്ഷ്വദീപിലെ ജനവാസമുള്ള എല്ലാ ദ്വീപിലും കുടിവെള്ള വിതരണം ഉറപ്പാക്കുമെന്നും കവരത്തി ദ്വീപിനെ മോദിസര്ക്കാരിന്റെ ചെറു സ്മാര്ട്ട് നഗര പദ്ധതിയില് ഉള്പ്പെടുത്തുമെന്നും ബിജെപി അഖിലേന്ത്യാ അധ്യക്ഷന് അമിത്ഷാ പ്രഖ്യാപിച്ചു. മൂന്നു ദിവസത്തെ പാര്ട്ടി പ്രചാരണ പരിപാടിയുടെ ഭാഗമായി കവരത്തിയില് പൊതുയോഗത്തില് സംസാരിക്കുകയായിരുന്നു അമിത് ഷാ.
പത്ത് ദ്വീപുകളെ ബന്ധപ്പെടുത്തി ടൂറിസം വികസന പദ്ധതിയുടെ ആവിഷ്ക്കരിച്ച് കേന്ദ്രസര്ക്കാര് ദ്വീപുനിവാസികള്ക്കൊപ്പം നില്ക്കുമെന്ന് അമിത്ഷാ ഉറപ്പുനല്കി. ടൂറിസ്റ്റ് കപ്പലുകള്, നാല് ചരക്ക് അന്തര്വാഹിനികള്, ഒന്പത് ചരക്ക് കപ്പലുകള് തുടങ്ങിയവ ദ്വീപിന് ലഭ്യമാക്കും. മീന്പിടുത്ത സൗകര്യം മെച്ചപ്പെടുത്തും. കോള്ഡ്സ്റ്റോറേജ് സൗകര്യങ്ങള് വര്ധിപ്പിക്കും. ദ്വീപില് ഊര്ജം ലഭ്യമാക്കാന് വിവിധ പദ്ധതികള് നടപ്പാക്കും, അമിത്ഷാ ഉറപ്പുനല്കി. അടിസ്ഥാന സൗകര്യ വികസനം, 4 ജി ഇന്റര്നെറ്റ് സൗകര്യം തുടങ്ങിയവ അടിയന്തരമായി ലഭ്യമാക്കും, അദ്ദേഹം പറഞ്ഞു.
യോഗത്തില് ലക്ഷദ്വീപ് പാര്ട്ടി സംസ്ഥാന പ്രസിഡന്റ് അബ്ദുഖാദര് ഹാജി അധ്യക്ഷനായി. പാര്ട്ടി ദേശീയ സെക്രട്ടറി ബി.എല്. സന്തോഷ്, ദേശീയ നേതാവ് അരവിന്ദ് മേനോന്, മുന് സംസ്ഥാന അധ്യക്ഷന് ഡോ. മുത്തുക്കോയ, സെയ്ത് മുഹമ്മദ് കോയ, ജാഫര് ഷാ, സിറാജ് കോയ തുടങ്ങിയവര് സംസാരിച്ചു.
ദ്വീപില് ബിജെപി ശക്തിപ്പെടുത്താന് ജൂണ് ഒന്നുമുതല് നവംബര് 30 വരെ മെമ്പര്ഷിപ്പ് പ്രചാരണ പരിപാടി നടത്താന് ജില്ലാ-സംസ്ഥാന ഭാരവാഹി യോഗത്തില് അമിത്ഷാ നിര്ദ്ദേശിച്ചു. ഇന്ന് കവരത്തിയില് വിവിധ പരിപാടികളില് പങ്കെടുക്കുന്ന അദ്ദേഹം നാളെ ആന്ത്രോത്ത് ദ്വീപില് പൊതുസമ്മേളനത്തില് പങ്കെടുക്കും.
