കണ്ണൂര്: വര്ഷങ്ങളായി മുഴപ്പിലങ്ങാട് എഫ്സിഐ ഗോഡൗണിന്റെ പരിധിയില് നിന്നും വിതരണം ചെയ്തുവരുന്ന ഭക്ഷ്യ ധാന്യങ്ങള് പയ്യന്നൂരില് നിന്നും വിതരണം ചെയ്യാനുള്ള നീക്കം ജില്ലയിലെ ചില മേഖലകളില് ഭക്ഷ്യ വിതരണത്തിന് തടസ്സമാകുമെന്ന് പരാതി. മുഴപ്പിലങ്ങാട് നിന്നും തലശ്ശേരി താലൂക്കിന് പുറമെ ഇരിട്ടി, കണ്ണൂര്, തളിപ്പറമ്പ് താലൂക്കിലെ ചില മേഖലകളില് കൂടി ഭക്ഷ്യ ധാന്യങ്ങള് വിതരണം ചെയ്തിരുന്നു. എന്നാല് സര്ക്കാരിന്റെ പുതിയ ഉത്തരവ് പ്രകാരം കണ്ണൂര് താലൂക്കിലെ തോട്ടട, ചക്കരക്കല്, ചേലേരി, പൂതപ്പാറ, തളിപ്പറമ്പ് താലൂക്കിലെ ഇരിക്കൂര്, എന്നിവിടങ്ങളിലേക്കുള്ള അരിയടക്കമുള്ള ഭക്ഷ്യ ധാന്യങ്ങള് ജൂണ് ഒന്നുമുതല് പയ്യന്നൂര് എഫ്സിഐ ഗോഡൗണില് നിന്നാക്കി മാറ്റാനാണ് സിവില്സപ്ലൈസ് വകുപ്പിന്റെ തീരുമാനം.
ഭക്ഷ്യവിതരണ നിയമപ്രകാരം വാതില്പടി വിതരണമാണ് നടന്നുവരുന്നതെങ്കിലും പയ്യന്നൂര് എഫ്സിഐ ഗോഡൗണില് നിന്നും ഈ മേഖലകളിലേക്ക് ഭക്ഷ്യധാന്യങ്ങള് എത്തിക്കുന്നത് ഏറെ ദുരിതമായിമാറും. അതോടൊപ്പം മുഴപ്പിലങ്ങാട് ഗോഡൗണുമായി ബന്ധപ്പെട്ട് പ്രവര്ത്തിച്ചുവരുന്നു നിരവധി തൊഴിലാളികളുടെയും ലോറി ഡ്രൈവര് മാരുടെയും ജോലിയെയും ഇത് ബാധിക്കും.
നൂറ് ചുമട്ട് തൊഴിലാളികളും എഴുപത്തിയഞ്ചോളം ലോറി തൊഴിലാളികളും അത്രതന്നെ വരുന്ന ലോറി ഉടമകളുമാണ് മുഴപ്പിലങ്ങാട് ഗോഡൗണിനെ ആശ്രയിച്ചുകഴിയുന്നത്. ഇപ്പോള് എടക്കാട് റെയില്വേ സ്റ്റേഷനോടനുബന്ധിച്ചുള്ള ഗുഡ്സ്ഷെഡും മുഴപ്പിലങ്ങാട്ടെ എഫ്സിഐ ഗോഡൗണും ഇതുവഴി നോക്കുകുത്തിയായി മാറുമെന്നും പരാതിയുണ്ട്.
സിവില്സപ്ലൈസിന്റെ പുതിയ തീരുമാനം പുനപരിശോധിക്കണമന്നാവശ്യപ്പെട്ട് തൊഴിലാളി സംഘടനകള് അധികൃതര്ക്ക് പരാതി നല്കിയിട്ടുണ്ട്.
