നെടുമ്പാശേരി: കുന്നുകര പഞ്ചായത്ത് പത്താം വാര്ഡിലെ കുടിവെള്ള ക്ഷാമം പരിഹരിക്കാത്തതിനെതിരെ വ്യത്യസ്തമായ പ്രതിഷേധ സമരം. പഞ്ചായത്ത് ഓഫീസ് വളപ്പിനുള്ളില് അലക്കിയും കുളിച്ചുമാണ് നാട്ടുകാര് പ്രതിഷേധിച്ചത്.
സ്ത്രീകളും മുതിര്ന്നവരും അടങ്ങുന്ന സംഘം അലക്കുകല്ലും തുണിയും വെള്ളവയുമായി പഞ്ചായത്ത് ഓഫീസിലെത്തി. കാര് പോര്ച്ചില് സ്ത്രീകള് അലക്ക് ആരംഭിച്ചപ്പോഴാണ് ഓഫീസ് ജീവനക്കാര് വിവരമറിയുന്നത്. അതിനിടെ യുവാവ് അവിടെനിന്ന് കുളിച്ചു. കുടിവെള്ള ക്ഷാമം പരിഹരിക്കാന് അടിയന്തിര നടപടിയാവശ്യപ്പെട്ട് നിരവധി തവണ ജനപ്രതിനിധികളെയും വാട്ടര് അതോറിട്ടി അധികൃതരെയും അറിയിച്ചിട്ടും നടപടിയില്ലാത്ത സാഹചര്യത്തിലായിരുന്നു പുതിയ സമരമുറ.
രണ്ടാഴ്ച്ച മുമ്പ് നാട്ടുകാര് മേയ്ക്കാട് വാട്ടര് അതോറിട്ടി ഉദ്യോഗസ്ഥനെ ഉപരോധിച്ചതിനെ തുടര്ന്ന് കുറിച്ചുദിവസം വെള്ളം എത്തിയെങ്കിലും പിന്നീട് മുടങ്ങി. ചൊവ്വര സ്കീമില് നിന്നും വരുന്ന വെള്ളം അടുവാശേരി മാലായികുന്നിലെ ജലസംഭരണിയില് ശേഖരിച്ച ശേഷമാണ് കുന്നുകര ഉള്പ്പെടെയുള്ള സമീപ പ്രദേശങ്ങളിലേക്ക് വിതരണം ചെയ്യുന്നത്.
ആവശ്യമായ മര്ദ്ദത്തില് വെള്ളം പമ്പ് ചെയ്യാത്തതിനാല് ഉയര്ന്ന പ്രദേശങ്ങളിലേക്ക് വെള്ളം കയറാത്തതാണ് പ്രശ്നം. മര്ദ്ദം കൂട്ടിയാല് കാലപ്പഴക്കം ചെന്ന ഭൂഗര്ഭ പൈപ്പുകള് പൊട്ടുമെന്നാണ് വിശദീകരണം. പൈപ്പ് മാറ്റാന് ഫണ്ട് അനുവദിക്കാതെ അധികാരികള് കബളിപ്പിക്കുകയാണെന്ന് സമരക്കാര് ആരോപിച്ചു.
