പയ്യന്നൂര്: രാമന്തളി മാലിന്യ പ്രശ്നത്തില് ജന ആരോഗ്യസംരക്ഷണസമിതി നടത്തുന്ന അനിശ്ചിതകാല സമരം അമ്പതു ദിവസം പിന്നിട്ടിട്ടും പ്രശ്നപരിഹാരമുണ്ടാകാത്തതില് പ്രതിഷേധിച്ച് സമരസമിതി പ്രവര്ത്തകര് റോഡ് ഉപരോധിച്ചു. ഉപരോധക്കാരെ പോലീസ് ബലം പ്രയോഗിച്ച് നീക്കാന് ശ്രമിച്ചത് നേരിയ സംഘര്ഷത്തിനിടയാക്കി. അറുപതോളം സമരക്കാരെ പോലീസ് അറസ്റ്റു ചെയ്തു നീക്കി.
ഇന്നലെ രാവിലെയാണ് ജന ആരോഗ്യസംരക്ഷണസമിതി പ്രവര്ത്തകര് പ്രകടനവുമായി എത്തി ശങ്കരനാരായണ ക്ഷേത്രത്തിനു മുന്നില് റോഡ് ഉപരോധിച്ചത്. രാവിലെ 9.30 ഓടെ ആരംഭിച്ച ഉപരോധസമരം കെ.പി.സി.നാരായണ പൊതുവാള് ഉദ്ഘാടനം ചെയ്തു. വിവരമറിഞ്ഞ് വന് പോലിസ് സംഘം സ്ഥലത്തെത്തിയിരുന്നു. പതിനൊന്ന് മണിയായതോടെ പയ്യന്നൂര് എസ്ഐ കെ.പി.ഷൈനിന്റെ നേതൃത്വത്തില് പോലീസ് സംഘം സമരക്കാരെ അറസ്റ്റു ചെയ്ത് നീക്കാന് ശ്രമിച്ചത് ബഹളത്തിനിടയാക്കി. മാലിന്യപ്രശ്നത്തിന് ശാശ്വത പരിഹാരം കാണാതെ ഉപരോധസമരത്തില് നിന്ന് പിന്മാറില്ലെന്ന് സമരസമിതി നേതാക്കള് അറിയിച്ചതോടെ പോലീസ് ബലം പ്രയോഗിച്ച് സമരക്കാരെ പോലീസ് വാഹനത്തില് കയറ്റാന് ശ്രമിച്ചപ്പോള് സ്ത്രീകളടക്കമുള്ളവര് പോലീസിനെ തടഞ്ഞതാണ് സംഘര്ഷത്തിന് ഇടയാക്കിയത്.
തുടര്ന്ന് പയ്യന്നൂര് സിഐ ആസാദിന്റെ നേതൃത്വത്തില് വനിതാ പോലീസടക്കമുള്ള കൂടുതല് പോലീസ് സ്ഥലത്തെത്തി 70 ഓളം സമരസമിതി പ്രവര്ത്തകരെ ബലം പ്രയോഗിച്ച് അറസ്റ്റു ചെയ്ത് പോലീസ് വാഹനത്തില് കയറ്റുകയായിരുന്നു. സ്റ്റേഷനിലെത്തിയ പ്രവര്ത്തകര് കുത്തിയിരുന്ന് മുദ്രാവാക്യം വിളിച്ചു. വൈകുന്നേരത്തോടെ കോടതിയില് ഹാജരാക്കിയ പ്രവര്ത്തകരെ ജാമ്യത്തില് വിട്ടയച്ചു. സമരസമിതി പ്രവര്ത്തകരെ അറസ്റ്റു ചെയ്തതറിഞ്ഞ് നിരവധി ആളുകള് സ്റ്റേഷനു മുന്നില് തടിച്ചുകൂടിയിരുന്നു.
