അയ്മനം: അര്ബുദരോഗം തകര്ത്ത കുടുംബത്തെ സഹായിക്കാന് നാട്ടുകാര് ഒന്നിക്കുന്നു. അയ്മനം കുടമാളൂര് ആറ്റിങ്ങല് മഠത്തില് ആര്. സാജന്റെ കുടുംബമാണ് അര്ബുദരോഗ ബാധയെ തുടര്ന്ന് നിരാലംബമായത്. 2006 മുതല് ഈ കുടുംബത്തെ രോഗങ്ങള് വേട്ടയാടുന്നു. കോട്ടയം മെഡിക്കല് കോളേജിലെ ജീവനക്കാരനായിരുന്ന സാജന്റെ പിതാവ് രാജനാണ് ആദ്യം അര്ബുദം പിടിപ്പെട്ടത്.
ശ്വാസകോശത്തില് അര്ബുദം ബാധിച്ച അദ്ദേഹം 2007-ല് അന്തരിച്ചു. സാമ്പത്തിക പ്രശ്നങ്ങള് രൂക്ഷമായതോടെ സാജന് വിദേശത്ത് പോയി. ഇതിനിടയില് അമ്മ ശാന്തയ്ക്ക് വൃക്കരോഗം പിടിപ്പെട്ടു. ചികിത്സയ്ക്കായി വന്തുക ചിലവായി. അമ്മയുടെ രോഗം ഗുരുതരമായതോടെ സാജന് നാട്ടില് തിരിച്ചെത്തി. അമ്മയുടെചികിത്സക്കായി വീട് കടപ്പെടുത്തി. 2014-ല് അമ്മയും മരിച്ചു. ഇതിനിടയില് വായില് അര്ബുദം പിടിപെട്ട സഹോദരന് സജി ആര്സിസിയില് ചികിത്സയിലാണ്.
വീണ്ടും വിദേശത്ത് ജോലിക്കുപോയി നാട്ടിലെത്തിയ സാജന് കാലില് വേദന അനുഭവപ്പെട്ടു. പരിശോധനയില് സാജന്റെ എല്ലുകള്ക്ക് അര്ബുദം ബാധിച്ചതായി കണ്ടെത്തി. മജ്ജ മാറ്റിവച്ചാല് രോഗം ഭേദമാകുമെന്ന് ഡോക്ടര്മാര് പറയുന്നു. സാജനെ സഹായിക്കാന് വിവിധ റെസിഡന്സ് അസോസിയേഷനുകളും ജനപ്രതിനിധികളും മുന്നിട്ടിറങ്ങി.
സാജന് ചികിത്സാ സഹായഫണ്ട് എന്ന പേരില് മെയ് 7ന് പഞ്ചായത്തിലെ 6,7,8,9,10 വാര്ഡുകളിലെ മുഴുവന് ഭവനങ്ങളും സന്ദര്ശിച്ച് സംഭാവനകള് സ്വീകരിക്കും.
സാജനെ സഹായിക്കുന്നതിനായി കോട്ടയം മെഡിക്കല് കോളേജ് എസ്ബിടി ബ്രാഞ്ചില് പുതിയ അക്കൗണ്ടും തുറന്നിട്ടുണ്ട്. അക്കൗണ്ട് നമ്പര് 57011370896 ഐഎഫ്എസ് കോഡ് 0000111, ബ്രാഞ്ച് കോഡ് 70111.
