തൃശൂര്: ജിഷ്ണുപ്രണോയ് കേസില് മുഖ്യപ്രതി കൃഷ്ണദാസിനെ ചോദ്യം ചെയ്യുന്നത് വൈകും. ഡിജിപിയുടെ സാന്നിദ്ധ്യത്തില് യോഗം ചേര്ന്ന് തീരുമാനമെടുത്തശേഷം ഇനി കൃഷ്ണദാസിനെ ചോദ്യം ചെയ്താല് മതിയെന്നാണ് അന്വേഷണ സംഘത്തിന്റെ തീരുമാനം.
കഴിഞ്ഞ ദിവസം അറസ്റ്റിലായ വൈസ് പ്രിന്സിപ്പാള് ശക്തിവേലിന്റെ മൊഴിയുടെ അടിസ്ഥാനത്തിലാണ് വീണ്ടും ചോദ്യം ചെയ്യുന്നത്. ഇന്നലെ ഹൈക്കോടതിയില് നിന്നും സര്ക്കാരിന് വീണ്ടും വിമര്ശനം കേള്ക്കേണ്ടിവന്നതും ജനവികാരം എതിരായതും കണക്കിലെടുത്താണ് പോലീസ് കരുതലോടെ നീങ്ങുന്നത്. സ്പെഷല് പ്രോസിക്യൂട്ടര് ഉദയഭാനുവും പോലീസിന് നല്കിയ ഉപദേശം ഇതാണ്.
അതേസമയം പിടിയിലായ പ്രതികളില് നിന്ന് പോലും കൂടുതല് വിവരങ്ങള് ശേഖരിക്കാന് ആകാത്തതും തെളിവെടുപ്പ് പോലും നടത്താന് കഴിയാത്തതും പോലീസിന് വലിയ നാണക്കേടായിട്ടുണ്ട്. പിടിയിലായ ശക്തിവേലിന് ഇന്നലെ കോടതി ജാമ്യം അനുവദിച്ചതോടെ പോലീസ് ഇളിഭ്യരാവുകയായിരുന്നു.
ഒളിവിലായിരുന്ന കാലത്ത് പാലക്കാടുവെച്ച് താന് കൃഷ്ണദാസുമായി കൂടിക്കാഴ്ച നടത്തിയെന്ന ശക്തിവേലിന്റെ വെളിപ്പെടുത്തലും പോലീസിന് നാണക്കേടായി. ഗുരുതരമായ കുറ്റങ്ങള് ആരോപിക്കപ്പെട്ടിട്ടും കേസിലെ ഒരു പ്രതിയെപ്പോലും ഇതുവരെ അറസ്റ്റ് ചെയ്ത് ജയിലിലടയ്ക്കാനോ കസ്റ്റഡിയില് ചോദ്യം ചെയ്യാനോ പോലീസിന് കഴിഞ്ഞിട്ടില്ല. ഇത് സര്ക്കാരിന്റേയും പോലീസിന്റേയും ഗുരുതര വീഴ്ചയായാണ് വിലയിരുത്തപ്പെടുന്നത്.
കൃഷ്ണദാസിനെ ചോദ്യം ചെയ്യാന് ശ്രമിച്ചാല് കോടതിയില് നിന്ന് ഇടപെടല് ഉണ്ടാകുമോ എന്ന ഭയവും പോലീസിനുണ്ട്.
ശക്തിവേല് നല്കിയ മൊഴിയും കോളേജ് പ്രിന്സിപ്പല് വരദരാജന് നല്കിയ മൊഴിയും വിരുദ്ധമാണ്. ഒരുത്തരം കോപ്പിയടിച്ചുവെന്നാണ് ശക്തിവേല് ഇന്നലെ മൊഴിനല്കിയത്. എന്നാല് കൃഷ്ണദാസിന്റെ നിര്ദ്ദേശപ്രകാരം കോപ്പിയടിച്ചുവെന്ന് വ്യാജമായ റിപ്പോര്ട്ടുണ്ടാക്കാന് ശക്തിവേല് തന്നെ നിര്ബന്ധിക്കുകയായിരുന്നുവെന്നാണ് വരദരാജന്റെ മൊഴി. ഉത്തരക്കടലാസ് മുഴുവന് വെട്ടിയത് അധ്യാപകനായ പ്രവീണ് ആണെന്നാണ് ശക്തിവേലിന്റെ മൊഴി. എന്നാല് ഇത് ചെയ്തത് ശക്തിവേല് ആണെന്നാണ് വരദരാജന്റെ മൊഴി.
ഞായറാഴ്ച പിടിയിലായ ശക്തിവേലിനെ തൃശൂര് പോലീസ് ക്ലബ്ബിലെത്തിച്ച് അഞ്ചുമണിക്കൂറോളം ഐജി എം.ആര്.അജിത്കുമാറിന്റെ നേതൃത്വത്തില് ചോദ്യം ചെയ്തിരുന്നു. മാനേജ്മെന്റ് ആദ്യമുതല് പറയുന്ന കാര്യങ്ങള് ആവര്ത്തിക്കുക മാത്രമാണ് ശക്തിവേല് ചെയ്തത്.
ഡിജിപി പങ്കെടുക്കുന്ന ഉന്നതതലയോഗം അടുത്തദിവസം ചേരുമെന്ന് പോലീസ് വൃത്തങ്ങള് അറിയിച്ചു. അതിനിടെ വലയിലായ സി.പി.പ്രവീണിന്റെ അറസ്റ്റ് രേഖപ്പെടുത്താന് കഴിയാത്തത് പോലീസിന് നാണക്കേടായി.
ശക്തിവേലിനൊപ്പം പോലീസിന്റെ വലയിലായ ഇയാളെ അറസ്റ്റ് രേഖപ്പെടുത്താനോ കോടതിയില് ഹാജരാക്കാനോ പോലീസിന് കഴിഞ്ഞില്ല. പ്രവീണിന് ഇന്നലെ ഹൈക്കോടതി മുന്കൂര് ജാമ്യം അനുവദിക്കുകയും ചെയ്തു. ഇതോടെ പോലീസ് വീണ്ടും നാണംകെട്ടു.
