മാനന്തവാടി : ഉദ്യോഗം മറന്ന് തെരഞ്ഞെടുപ്പ് ലഹരിയിലായ പോലീസുകാരന് സസ്പെന്ഷന്. ത്രിതല പഞ്ചായത്ത് തെരഞ്ഞെടുപ്പില് എല്ഡിഎഫിന് വോട്ട് അഭ്യര്ത്ഥിച്ച് വാട്സ് ആപ് സന്ദേശമയച്ച വയനാട് കേണിച്ചിറ പോലീസ് സ്റ്റേഷനിലെ സിവില് പോലീസ് ഓഫീസര് സണ്ണി ജോസഫ് ആണ് സസ്പെന്ഷനിലായത്. വയനാട് ജില്ലാ പോലീസ് മേധാവിയാണ് അന്വേഷണ വിധേയമായി സസ്പെന്ഡ് ചെയ്തത്.
എല്ഡിഎഫ് അനുകൂല പോസ്റ്റ് ഔദ്യോഗിക നമ്പറില്നിന്നാണ് സണ്ണി അയച്ചത്. ‘ഇടതുപക്ഷത്തിനൊരു വോട്ട്. ഞങ്ങള്ക്ക് ജയിക്കാനല്ല നിങ്ങള് തോല്ക്കാതിരിക്കാന്’ എന്നായിരുന്നു പോസ്റ്റ്. ‘നാടേതായാലും ഇടതുപക്ഷത്തിന് വോട്ട്’ ചെയ്യാനും അഭ്യര്ത്ഥനയുണ്ട്.
സര്ക്കാര് ഉദ്യോഗസ്ഥര് തെരഞ്ഞെടുപ്പ് പ്രചാരണങ്ങളില് പങ്കാളികളാവരുതെന്ന നിര്ദ്ദേശമിരിക്കെ വയനാട്ടില് പല സ്ഥലങ്ങളിലും പോലീസ് ഉദ്യോഗസ്ഥരുള്പ്പെയുള്ളവര് ഇടത്-വലത് മുന്നണികള്ക്കായി പ്രചാരണം നടത്തുന്നതായി ആരോപണമുണ്ട്.
