സമാന്തര ജൂറിയേക്കാള് നല്ലത് കുറ്റമറ്റ വിധി നിര്ണയത്തിന് മികച്ച ജഡ്ജസിനെ തെരഞ്ഞെടുക്കുന്നതാണെന്ന് നാടക-സിനിമാ സംവിധായകന് ഷൈജു അന്തിക്കാട്. സമാന്തരമായി വിധി പ്രഖ്യാപിക്കുന്നത് മത്സരാര്ത്ഥികളെപ്പോലും മാനസികമായി തകര്ക്കും.
മുന് കാലങ്ങളില് നല്ല വിധികര്ത്താക്കളുണ്ടായിരുന്നു. അതുകൊണ്ട് തന്നെ അപ്പീലുകളും കുറവായിരുന്നു. ഇത്തവണ എല്ലാ നാടകങ്ങള്ക്കും എ പ്ലസ് നല്കിയിട്ടുണ്ട്. എന്നാല് സംസ്ഥാന കലോത്സവത്തില് പങ്കെടുക്കാന് അര്ഹതയില്ലാത്ത നാടകങ്ങളും ഉണ്ടായിരുന്നു. അഭിനയ പ്രതിഭകളെ കാണാന് കഴിഞ്ഞു. അവതരണ രീതിയില് പരീക്ഷണങ്ങള് കൊണ്ട് വരേണ്ടതുണ്ട്.
കുട്ടികള്ക്ക് ബോധ്യപ്പെടുന്ന ചിന്തകളാണ് അവതരിപ്പിക്കേണ്ടത്. ഇന്ന് മത്സരാര്ത്ഥികള്ക്ക് ഏറെ പ്രോത്സാഹനം ലഭിക്കുന്നുണ്ട്. അതോടൊപ്പം അമിത ബലപരീക്ഷണത്തിലേക്ക് മത്സരങ്ങള് പോകുന്നു. പണച്ചിലവും വര്ദ്ധിച്ചു. പണ്ട് ഗവണ്മെന്റ് സ്കൂളുകളാണ് നാടകവേദികള് അടക്കി വാണത്. എന്നാല് പണക്കൊഴുപ്പിന്റെ മേളയായപ്പോള് മാനേജ്മെന്റ് സ്കൂളുകള് ഈ സ്ഥാനം കയ്യടക്കി.
