ഇത് എന്നെ ഉദ്ദേശിച്ചാണ്, എന്നെ മാത്രം ഉദ്ദേശിച്ചാണ്… എന്നെ തന്നെ ഉദ്ദേശിച്ചാണ്… സംസ്ഥാന കലോത്സവത്തിലെ കാര്ട്ടൂണ് മത്സരം വിലയിരുത്തിയാല് മന്ത്രി കെ.എം.മാണി പറയുക ഈ സിനിമാ ഡയലോഗ് ആയിരിക്കും. ഹൈസ്കൂള്, ഹയര്സെക്കണ്ടറി വിഭാഗം കാര്ട്ടൂണ് മത്സരത്തില് നിറഞ്ഞ് നിന്നത് മാണിയും കോഴയും. ഹൈസ്കൂള് വിഭാഗം മത്സരാര്ഥികള്ക്ക് കോഴയായിരുന്നു ലഭിച്ച വിഷയം.
ഇരുപത് പേര് പങ്കെടുത്തതില് ഭൂരിഭാഗവും ബാര് കോഴയിലാണ് ഹാസ്യത്തിന് വക കണ്ടെത്തിയത്. സമകാലിക രാഷ്ട്രീയ നാടകങ്ങളെ കണക്കിന് കളിയാക്കിയ രചനകളില് ബാര്കോഴ കത്തിനിന്നു. മുഖ്യമന്ത്രിയാകാന് തയ്യാറെടുത്ത മാണിയും അവസരവാദ നിലപാടെടുത്ത പ്രതിപക്ഷവും കുട്ടികളുടെ വിമര്ശനത്തിന്റെ ചൂടറിഞ്ഞു. മുഖ്യമന്ത്രിയാണ് ആരോപണത്തിന് പിന്നിലെന്ന സൂചനയും കാര്ട്ടൂണുകള് നല്കുന്നു.
മാളികമുകളേറിയ മന്നന്റെ തോളില് മാറാപ്പ് കേറ്റുന്നതും ഭവാന് എന്നതായിരുന്നു ഹയര്സെക്കണ്ടറി വിഭാഗത്തിനുള്ള വിഷയം. ഇതിലും താരം മാണിയും കോഴയും തന്നെ. പ്രതിപക്ഷം കൈകൊട്ടിവിളിച്ച മാണി ബാര് കോഴയോടെ എടുക്കാച്ചരക്കായതാണ് ഭൂരിഭാഗവും ചൂണ്ടിക്കാട്ടിയത്. ശശി തരൂര്, ശ്രീശാന്ത്, കലോത്സവങ്ങളിലെ കോഴ എന്നിവയും വിഷയങ്ങളായി. മികച്ച നിലവാരം പുലര്ത്തിയ മത്സരത്തില് ഹൈസ്കൂള് വിദ്യാര്ത്ഥികളാണ് മുന്നിട്ട് നിന്നത്.
പത്രത്തിലെ രീതിയാണ് ഭൂരിഭാഗവും തെരഞ്ഞെടുത്തത്. സ്വന്തം രീതി പിന്തുടരുന്നവരുമുണ്ട്. മത്സരത്തിന് സമയം ദീര്ഘിപ്പിക്കണമെന്ന ആവശ്യം ഇത്തവണയും ഉയര്ന്നു. ഒരു മണിക്കൂറാണ് കാര്ട്ടൂണിന് ലഭിക്കുന്നത്. ഹൈസ്കൂള് വിഭാഗത്തില് കോട്ടയം കിടങ്ങൂര് എന്എസ്എസ് ഹയര്സെക്കണ്ടറി സ്കൂളിലെ നീലകണ്ഠശര്മ്മയും ഹയര്സെക്കണ്ടറി വിഭാഗത്തില് വയനാട് പയ്യമ്പള്ളി എസ്സിഎച്ച്എസ്എസ്സിലെ എം.എസ്. അര്ജുന് ഒന്നാം സ്ഥാനം നേടി. അപ്പീല് വഴി എത്തിയാണ് നീലകണ്ഠശര്മ്മ ഒന്നാമനായത്.
