ലോകകപ്പിലെ അതിവേഗ അര്‍ദ്ധസെഞ്ചുറി മക്കല്ലത്തിന്

വെല്ലിംഗ്ടണ്‍: ലോകക്രിക്കറ്റിലെ ഏറ്റവും മികച്ച ഹിറ്റര്‍മാരിലൊരാളായ ന്യൂസിലാന്റ് ക്യാപ്റ്റന്‍ ബ്രണ്ടന്‍ മക്കല്ലത്തിന് ആദ്യ പന്തുതന്നെ അതിര്‍ത്തിക്ക് പുറത്തേക്ക് പറത്തണമെന്ന ആഗ്രഹമാണ്. അതുകൊണ്ടുതന്നെ പലപ്പോഴും കിടിലന്‍ ബാറ്റിംഗാണ് മക്കല്ലം നടത്തിയിട്ടുള്ളത്. ഇന്നലെ ലോകകപ്പിലെ മൂന്നാം മത്സരത്തില്‍ ഇംഗ്ലണ്ടിനെതിരെ മക്കല്ലം വിശ്വരൂപം പൂണ്ടപ്പോള്‍ പഴങ്കഥയായത് സ്വന്തം പേരിലുള്ള രണ്ട് റെക്കോര്‍ഡുകളാണ്.

ലോകകപ്പിന്റെ ചരിത്രത്തിലെ ഏറ്റവും വേഗമേറിയ അര്‍ദ്ധസെഞ്ചുറിയുടെയും ഒരു ന്യൂസീലാന്റ് ബാറ്റ്‌സ്മാന്‍ നേടുന്ന ഏറ്റവും വേഗമേറിയ അര്‍ദ്ധസെഞ്ചുറിയുടെയും റെക്കോഡുകളാണ് മക്കല്ലം ഇന്നലെ ഇംഗ്ലണ്ടിനെതിരെ 18 പന്തില്‍ നിന്ന് അര്‍ദ്ധസെഞ്ചുറി തികച്ച തിരുത്തിയത്. 2007-ല്‍ സെന്റ് ലൂസിയയില്‍ വച്ച് കാനഡയ്‌ക്കെതിരെ 20 പന്തില്‍ നിന്ന് നേടിയ അര്‍ദ്ധസെഞ്ചുറിയാണ് മക്കല്ലം സ്വന്തം നാട്ടില്‍ വച്ച് പഴങ്കഥയാക്കിയത്.

ഏകദിന ക്രിക്കറ്റിന്റെ ചരിത്രത്തിലെ ഏറ്റവും വേഗമേറിയ മൂന്നാമത്തെ അര്‍ധസെഞ്ച്വറിയാണ് സ്റ്റീവ് ഫിന്‍ എറിഞ്ഞ ആറാം ഓവറിലെ അവസാന പന്തില്‍ സിക്‌സടിച്ച മക്കല്ലം തികച്ചത്. 16 പന്തില്‍ നിന്ന് അര്‍ദ്ധസെഞ്ചുറി നേടിയ ദക്ഷിണാഫ്രിക്കയുടെ എ.ബി. ഡിവില്ലിയേഴ്‌സും 17 പന്തില്‍ നിന്ന് അര്‍ദ്ധസെഞ്ചുറി നേടിയ സനത് ജയസൂര്യയും ഈ പട്ടികയിലെ ഒന്നും രണ്ടും സ്ഥാനക്കാര്‍. മക്കല്ലത്തിന് പുറമെ 1990 ഓസ്‌ട്രേലിയയുടെ സൈമണ്‍ ഒ’ഡോണല്‍ ശ്രീലങ്കക്കെതിരെയും 1996, 2002, 2014 വര്‍ഷങ്ങളില്‍ പാക്കിസ്ഥാന്റെ ഷാഹിദ് അഫ്രീദിയും 2013-ല്‍ ഇന്ത്യക്കെതിരെ ഓസീസ് താരം ഗ്ലെന്‍ മാക്‌സ്‌വെല്ലും 18 പന്തുകളില്‍ നിന്ന് അര്‍ദ്ധസെഞ്ചുറി തികച്ചിട്ടുണ്ട്.

ഫിന്‍ എറിഞ്ഞ ആറാം ഓവറിലെ അവസാന നാല് പന്തും മക്കലം നിലംതൊടാതെ അതിര്‍ത്തിക്ക് പുറത്തേക്ക് പറത്തിയപ്പോള്‍ ഗുപ്റ്റില്‍ അഞ്ച് റണ്‍സും ആദ്യ രണ്ട് പന്തുകളില്‍ നിന്നായി നേടി. 29 റണ്‍സാണ് ഈ ഒറ്റ ഓവറില്‍ പിറന്നത്. ഏകദിനത്തില്‍ ഒരോവറില്‍ ഏതെങ്കിലുമൊരു ന്യൂസീലാന്റ് ജോഡി നേടുന്ന ഏറ്റവും കൂടിയ മൂന്നാമത്തെ സ്‌കോറാണിത്. കരിയറില്‍ ഇത് അഞ്ചാം തവണയാണ് മക്കല്ലം 22-ഓ അതില്‍ കുറഞ്ഞ പന്തുകളില്‍ നിന്ന് അര്‍ദ്ധസെഞ്ചുറി തികയ്‌ക്കുന്നത്. എന്നാല്‍ ഇക്കാര്യത്തില്‍ ഒന്നാം സ്ഥാനം പാക്കിസ്ഥാന്റെ വെടിക്കെട്ട് ബാറ്റ്‌സ്മാന്‍ ഷാഹിദ് അഫ്രീദിയാണ്. ഒമ്പത് തവണയാണ് അഫ്രീദി ഈ നേട്ടം സ്വന്തമാക്കിയിട്ടുള്ളത്.

243 ഏകദിനങ്ങളില്‍ ന്യൂസിലാന്റിന് വേണ്ടി പാഡണിഞ്ഞിട്ടുള്ള മക്കല്ലം 5 സെഞ്ചുറികളും 29 അര്‍ദ്ധസെഞ്ചുറികളുമടക്കം 5637 റണ്‍സാണ് അടിച്ചുകൂട്ടിയിട്ടുള്ളത്. 92 ടെസ്റ്റുകളില്‍ നിന്ന് 11 സെഞ്ചുറികളും 28 അര്‍ദ്ധസെഞ്ചുറികളുമടക്കം 5870 റണ്‍സും മക്കല്ലം നേടിയിട്ടുണ്ട്. കഴിഞ്ഞ വര്‍ഷം ഇന്ത്യക്കെതിരെ വെല്ലിംഗ്ടണില്‍ നേടിയ 302 റണ്‍സാണ് മക്കല്ലത്തിന്റെ ടെസ്റ്റിലെ ഉയര്‍ന്ന സ്‌കോര്‍.