കോട്ടയം: ഭിന്നശേഷിയുള്ള വ്യക്തികളുടെ സാമൂഹികവല്ക്കരണവും അവകാശ സംരക്ഷണവും ഉറപ്പുവരുത്തുവാന് അന്താരാഷ്ട്ര സ്പെഷ്യല് ഒളിമ്പിക്സ് ആരംഭിച്ച യൂണിഫൈഡ് സ്പോര്ട്സിന്റെ സംസ്ഥാനതല ഉദ്ഘാടനം ഇന്ന് കോട്ടയത്ത് നടക്കും.
ഇന്ത്യയില് കേന്ദ്രസര്ക്കാരിന്റെ യുവജനകാര്യ-കായിക വകുപ്പിന് കീഴില് സ്പെഷല് ഒളിമ്പിക്സ് ഭാരതാണ് യൂണിഫൈഡ് സ്പോര്ട്സിന്റെ സംഘാടകര്. കേരളത്തില് സ്പെഷല് ഒളിമ്പിക്സ് ഭാരത് കേരളയാണ് ഈ സംരംഭത്തിന് നേതൃത്വം നല്കുന്നതെന്ന് സംഘാടകര് പത്രസമ്മേളനത്തില് അറിയിച്ചു. ഭിന്നശേഷിയുള്ള വ്യക്തികളും സാധാരണ സ്കൂള്, കോളേജ് വിദ്യാര്ത്ഥികളും സംയുക്തമായി രൂപീകരിക്കുന്ന ടീമുകള് തമ്മിലുള്ള കായിക മത്സരങ്ങളാണ് യൂണിഫൈഡ് സ്പോര്ട്സില് നടത്തുന്നത്.
കേരളത്തില് എംജി യൂണിവേഴ്സിറ്റിയുടെ 110 കോളേജുകളില് നിന്നുള്ള ഇരുപതിനായിരത്തോളം എന്എസ്എസ് വോളണ്ടിയര്മാര് ആദ്യഘട്ടത്തില് യൂണിഫൈഡ് സ്പോര്ട്സില് അംഗങ്ങളാവുകയാണ്. തുടര്ന്ന് എല്ലാ കോളേജുകളിലേയും സാധാരണ സ്കൂളുകളിലേയും വിദ്യാര്ത്ഥികളെ പങ്കെടുപ്പിച്ചുകൊണ്ട്, ഭിന്നശേഷിയുള്ള വിദ്യാര്ത്ഥികളുടേയും മുതിര്ന്നവരുടേയും സാമൂഹിക സുരക്ഷയും മനുഷ്യാവകാശങ്ങളും സംരക്ഷിക്കുവാനും പുതിയ മാനവികതയുടെ മൂല്യങ്ങള് വളരുന്ന തലമുറയില് പങ്കുവയ്ക്കുവാനുമാണ് യൂണിഫൈഡ് സ്പോര്ട്സ്കൊണ്ട് ഉദ്ദേശിക്കുന്നത്.
ഭാരത് കേരള, എംജി യൂണിവേഴ്സിറ്റി എന്എസ്എസ് വിഭാഗവുമായി സഹകരിച്ചുകൊണ്ട് സംഘടിപ്പിക്കുന്ന യൂണിഫൈഡ് സ്പോര്ട്സിന്റെ സംസ്ഥാനതല ഉദ്ഘാടനം ഇന്ന് കുറവിലങ്ങാട് ദേവമാത കോളേജില് മുഖ്യമന്ത്രി ഉമ്മന് ചാണ്ടി നിര്വ്വഹിക്കും. ഉച്ചയ്ക്ക് 12.30ന് നടക്കുന്ന യോഗത്തില് മന്ത്രി തിരുവഞ്ചൂര് രാധാകൃഷ്ണന് അദ്ധ്യക്ഷത വഹിക്കും. മോന്സ് ജോസഫ് എംഎല്എ, സ്പെഷല് ഒളിംമ്പിക്സ് ഭാരത് ചെയര്മാന് ഡോ. സതീഷ്പിള്ള, നാഷണല് സ്പോര്ട്സ് ഡയറക്ടര് വിക്ടര് വാസ്, എംജി യൂണിവേഴ്സിറ്റി വൈസ് ചാന്സലര് ഡോ. ബാബു സെബാസ്റ്റ്യന്, എംജി യൂണിവേഴ്സിറ്റി എന്എസ്എസ് പ്രോഗ്രാം കോ-ഓര്ഡിനേറ്റര് ഡോ. സാബു കുട്ടന് തുടങ്ങിയവര് പങ്കെടുക്കും.
പത്രസമ്മേളനത്തില് ദേവമാതാ കോളേജ് പ്രിന്സിപ്പല് ഡോ. ജോയി ജേക്കബ്, എന്എസ്എസ് പ്രോഗ്രാം കോ-ഓര്ഡിനേറ്റര് ഡോ. സിബി കുര്യന് എന്നിവര് പങ്കെടുത്തു.
