കണ്ണൂര്‍: അക്രമത്തിനിരയാകുന്ന സ്ത്രീകള്‍ക്ക് താല്‍ക്കാലിക അഭയവും വൈദ്യസഹായവും നിയമസഹായവും മാനസികപിന്തുണയുമുള്‍പ്പെടെയുള്ള സേവനങ്ങളും ഒരു കുടക്കീഴില്‍ എത്തിക്കുന്ന വണ്‍ സ്റ്റോപ്പ് സെന്ററിന് ജില്ലയില്‍ കേന്ദ്രമൊരുങ്ങുന്നു. പീഡനം ഉള്‍പ്പെടെ സ്ത്രീകള്‍ക്ക് നേരെ ഉണ്ടാകുന്ന ഏതൊരു അതിക്രമത്തിലും ഇരയായവര്‍ക്ക് താല്‍ക്കാലിക അഭയം ഒരുക്കുകയാണ് ലക്ഷ്യം. കൂത്തുപറമ്പ് ഗവ. ആശുപത്രി കോമ്പൗണ്ടില്‍ താല്‍ക്കാലിക കെട്ടിടത്തില്‍ സെന്റര്‍ ഉടന്‍ പ്രവര്‍ത്തനമാരംഭിക്കും.
പന്ത്രണ്ടാം പഞ്ചവത്സര പദ്ധതിയില്‍ ഉള്‍പ്പെടുത്തി സ്ത്രീ ശാക്തീകരണത്തിനായി നടപ്പാക്കുന്ന പദ്ധതികളില്‍ പ്രധാനമാണ് വണ്‍ സ്റ്റോപ്പ് വണ്‍ സെന്റര്‍. ഗാര്‍ഹിക പീഡനം, ആസിഡ് ആക്രമണം, മാനസിക ശാരീരിക പീഡനം, ദുരഭിമാനക്കൊല, ശൈശവ വിവാഹം, കുട്ടികള്‍ക്കെതിരെയുള്ള ലൈംഗികാതിക്രമം എന്നിവയില്‍ ഇരയാക്കപ്പെടുന്നവര്‍ക്ക് സുരക്ഷയും വൈദ്യസഹായവും ഉറപ്പാക്കുകയാണ് ലക്ഷ്യം. കൂടാതെ പോലീസ്-നിയമസഹായം നല്‍കാനും ആവശ്യമെങ്കില്‍ കൗണ്‍സിലിംഗ് ഏര്‍പ്പെടുത്താനും വണ്‍ സ്റ്റോപ്പ് സെന്ററില്‍ സൗകര്യമൊരുക്കും. സമാനമായ കേസുകളില്‍ വൈദ്യസഹായത്തിനായി ആശുപത്രികളില്‍ എത്തിക്കുന്നവരെ സെന്ററില്‍ എത്തിക്കുകയാണ് ആദ്യപടി. അവിടെ നിന്ന് വിവരം പോലീസിലും മറ്റ് വിഭാഗത്തിലേക്കും കൈമാറും. നിലവില്‍ 24 മണിക്കൂര്‍ സേവനവുമായി ഹെല്‍പ്പ് ലൈന്‍ (181) പദ്ധതിയുടെ ഭാഗമായി പ്രവര്‍ത്തിക്കുന്നുണ്ട്. സാമൂഹ്യനീതി വകുപ്പിനു കീഴില്‍ വനിത വികസന കോര്‍പ്പറേഷനാണ് ഹെല്‍പ്പ്‌ലൈന്‍ പ്രവര്‍ത്തനം നിര്‍വഹിക്കുന്നത്.
കൂത്തുപറമ്പ് ആശുപത്രിക്ക് സമീപം 1500 ചതുരശ്ര അടി സ്ഥലത്ത് സെന്ററിന് സ്ഥിരം കെട്ടിടവും സൗകര്യങ്ങളും ഒരുക്കാനും നടപടി ആരംഭിച്ചു. നിര്‍ഭയ ഫണ്ടുപയോഗിച്ചാണ് പദ്ധതി നടപ്പാക്കുന്നത്. സെന്ററിന്റെ പ്രവര്‍ത്തനചുമതല തെരഞ്ഞെടുക്കപ്പെടുന്ന എന്‍ജിഒയെ ഏല്‍പ്പിക്കാനാണ് ആലോചിക്കുന്നത്. ജില്ലയില്‍ സ്റ്റോപ്പ് വണ്‍ സെന്റര്‍ ആരംഭിക്കുന്നത് സംബന്ധിച്ച കാര്യങ്ങള്‍ ചര്‍ച്ച ചെയ്യുന്നതിനായി കലക്ടര്‍ മിര്‍ മുഹമ്മദ് അലിയുടെ അധ്യക്ഷതയില്‍ ചേര്‍ന്ന മാനേജ്‌മെന്റ് കമ്മറ്റി യോഗത്തില്‍ എ.ഡി.എം ഇ മുഹമ്മദ് യൂസഫ്, മാനേജ്‌മെന്റ് കമ്മറ്റി അംഗങ്ങള്‍ എന്നിവര്‍ സംബന്ധിച്ചു. വണ്‍ സ്റ്റോപ്പ് സെന്റര്‍ പദ്ധതിയെക്കുറിച്ച് വുമണ്‍ പ്രൊട്ടക്ഷന്‍ ഓഫീസര്‍ സുലജ വിശദീകരിച്ചു.
