ചാത്തന്നൂര്: ദേശസാല്കൃത ബാങ്കുകളുടെ എടിഎം കൗണ്ടറുകള് കാശില്ലാതെ നോക്കുകുത്തികളാകുന്നു. ചാത്തന്നൂര് മുതല് പാരിപ്പള്ളി വരെ ദേശീയപാതയോരങ്ങളില് മാത്രം ഏകദേശം പന്ത്രണ്ടോളം എടിഎം കൗണ്ടറുകളാണ് ഉള്ളത്. ഇന്നലെ രാവിലെ മുതല് നാലുമണി വരെ ഭൂരിഭാഗം എടിഎം കൗണ്ടറുകളിലും കാശ് ഉണ്ടായിരുന്നില്ല.
ചാത്തന്നൂര് ഭാഗങ്ങളിലുള്ള സ്ത്രീകളടക്കം കല്ലുവാതുക്കല് പാരിപ്പള്ളി എടിഎം കൗണ്ടറുകളില് കയറിയിറങ്ങുന്ന കാഴ്ചയാണ് ഉണ്ടായത്. എന്നാല് ആര്ക്കും കാശ് ലഭിച്ചതുമില്ല. കാശുണ്ടായിരുന്ന ഒരു കൗണ്ടറില് പതിനായിരം രൂപ ലഭിക്കുന്നതിനായി ഒരുപാടുതവണ എടിഎം കാര്ഡ് ഉപയോഗിക്കേണ്ടി വന്നതായും പരാതിയുണ്ട്. അതത് ബാങ്കിന്റെ എടിഎം കൗണ്ടറില് അല്ലാതെ അഞ്ചില് കൂടുതല് തവണ ഇടപാട് നടത്തിയാല് സര്വീസ് ചാര്ജ് ഇനത്തില് 15 മുതല് 21 രൂപ വരെ ഓരോ തവണയും ഈടാക്കും എന്നിരിക്കെയാണ് ബാങ്കിന്റെ പ്രവര്ത്തനപോരായ്മ മൂലം ജനങ്ങള് കൊള്ളയടിക്കപെടുന്നത്. സര്വീസ് ചാര്ജ്, ലോ മിനിമംബാലന്സ്, ഓവര് എടിഎം ഉപയോഗം എന്നൊക്കെ പറഞ്ഞ് പകല്കൊള്ള നടത്തുമ്പോള് നല്ല സേവനം കൊടുക്കാന് ബാങ്കുകള്ക്ക് കഴിയുന്നില്ല. എടിഎമ്മുകളില് കാശില്ലാത്ത അവസ്ഥ നിത്യസംഭവമാണെന്ന് നാട്ടുകാര് പറയുമ്പോള് രണ്ടുദിവസം തുടര്ച്ചയായി ബാങ്ക് അവധിയായതിനാലാണ്—ഇങ്ങനെ ഉണ്ടായതെന്ന് ബാങ്ക് അധികൃതര് പറഞ്ഞു.
