പാലാ: വെള്ളിലാപ്പിള്ളിയിലേയും പരിസര പ്രദേശങ്ങളിലെയും മയക്കുമരുന്ന് ലഹരി മാഫിയയെ ഒതുക്കാന് രാമപുരം സി.ഐ. ബാബുക്കുട്ടന്റെ നേതൃത്വത്തില് ‘ഓപ്പറേഷന് മുക്തി പരിപാടി ആരംഭിച്ചു. വെള്ളിലാപ്പിള്ളി ജംങ്ഷന് കേന്ദ്രീകരിച്ച് നിരവധി കുട്ടികളും യുവാക്കളും കഞ്ചാവ് ഉള്പ്പെടെ മയക്കുമരുന്നും മദ്യവും സ്ഥിരമായി ഉപയോഗിക്കുന്നതായി സൂചന ലഭിച്ചതിന്റെ അടിസ്ഥാനത്തിലാണ് പുതിയ ഓപ്പറേഷന് ആരംഭിക്കുന്നതെന്ന് പോലീസ് പറഞ്ഞു.
കഴിഞ്ഞ ദിവസം വെള്ളിലാപ്പിള്ളിയില് ഹോട്ടലുടമയെ കല്ലിനിടിച്ച് കൊലപ്പെടുത്താന് ശ്രമിച്ച കേസിലെ പ്രതികളെ പിടികൂടി വിശദമായി ചോദ്യം ചെയ്തപ്പോഴാണ് കഞ്ചാവ് വ്യാപകമായി ഉപയോഗിക്കുന്നതിന്റെ സൂചനകള് കിട്ടിയതെന്ന് പോലീസ് പറഞ്ഞു. സംഘത്തിലുള്പ്പെട്ട ഇരുപതോളം പേര് 17 വയസില് താഴെയുള്ളവരാണ് എന്നത് പോലീസിനെയും ഞെട്ടിക്കുന്നു.
ഓപ്പറേഷന് മുക്തിയുടെ ഭാഗമായി കഞ്ചാവുപയോഗിക്കുന്നതായി വ്യക്തമായി അറിവു ലഭിച്ച കുട്ടികളുടെ വീടുകളില് പോലീസ് റെയ്ഡ് തുടങ്ങി. സി.ഐ. ബാബുക്കുട്ടന്റെ നേതൃത്വത്തില് ഇന്നലെ ഇടക്കോലി, വെള്ളിലാപ്പിള്ളി ഭാഗങ്ങളിലെ വിവിധ വീടുകളില് റെയ്ഡ് നടത്തി. പോലീസ് എത്തിയപ്പോഴാണ് പല മാതാപിതാക്കളും തങ്ങളുടെ കുട്ടികള് കഞ്ചാവ് ഉപയോഗിച്ചിരുന്നതായി അറിയുന്നതെന്ന് അന്വേഷണ ഉദ്യോഗസ്ഥര് പറയുന്നു. വിവരമറിഞ്ഞ് പല മാതാപിതാക്കളും ഞെട്ടിത്തരിച്ചതായി പോലീസ് പറയുന്നു.
പാലാ, ഉഴവൂര്, പിഴക്, ഇടക്കോലി, ഏഴാച്ചേരി പ്രദേശങ്ങളില് നിന്നുള്ള ചില യുവാക്കള് കഞ്ചാവിന്റെ ഇടനിലക്കാരാണ്. വെള്ളിലാപ്പിള്ളി ലക്ഷംവീട് കോളനിയിലെ ചില കുട്ടികളും കഞ്ചാവ് ഉപയോഗിക്കുന്നവരും വില്പ്പനക്കാരുമാണെന്നും പോലീസിന് വിവരം ലഭിച്ചിരുന്നു. കഞ്ചാവും മയക്കുമരുന്നും ഉപയോഗിക്കുന്നതായി വിവരം ലഭിച്ച കുട്ടികളുടെ ഫോട്ടോ ഉള്പ്പെടുത്തി രാമപുരം സ്റ്റേഷനില് പ്രത്യേകം ഡയറക്ടറി സൂക്ഷിക്കുന്നുണ്ട്. ഇവരെ കൃത്യമായി നിരീക്ഷിക്കാന് ഷാഡോ പോലീസിനെയും നിയമിച്ചിട്ടുണ്ട്. തലമുടി പ്രത്യേക രീതിയില് വെട്ടി, കാതില് കടുക്കനുമിട്ട് കഴുത്തിലും കയ്യിലും പ്രത്യേകം ചരടുകള് കെട്ടിയ ഒരു സംഘമായിട്ടാണ് മാഫിയയില് പെട്ട കുട്ടികള് നടക്കുന്നതെന്ന് പോലീസിന് വിവരം ലഭിച്ചിട്ടുണ്ട്.
തുടര്ച്ചയായി സംഘട്ടനമുണ്ടാകുന്ന വെള്ളിലാപ്പിള്ളി ജംങ്ഷന് കേന്ദ്രീകരിച്ച് രാത്രിയും പകലും പോലീസ് പെട്രോളിംങ് നടത്തും. ഇവിടെ സന്ധ്യമുതല് മദ്യപാനവും പണം വച്ച് ചീട്ടുകളിയും പതിവാണെന്നും പോലീസിന് അറിവ് ലഭിച്ചിട്ടുണ്ട്. വിഷ്ണു, ബാലന്, അയൂബ്, സനന്തു, അര്ജ്ജുന് തുടങ്ങി കഞ്ചാവ് മാഫിയയില് ഉള്പ്പെട്ട നിരവധി യുവാക്കളുടെ പേരുവിവരങ്ങള് പോലീസ് ശേഖരിച്ചുകഴിഞ്ഞു.
വരും ദിവസങ്ങളില് ഇവരുടെ വീടുകളിലും ഇവര് തങ്ങുന്ന ഇടങ്ങളിലും റെയ്ഡ് നടത്തുമെന്നും പോലീസ് പറഞ്ഞു.
