കണ്ണൂര്: കണ്ണൂര് നഗരത്തിലെ ദേശീയ പാതയിലെ മദ്യശാലകള്ക്ക് താഴുവീണതോടെ മദ്യം ലഭിക്കാതെ സ്ഥിരം മദ്യപാനികള് ബുദ്ധിമുട്ടിലായി. ഇതോടെ നഗരത്തില് ദേശീയ പാതയില് നിന്നും 500 മീറ്ററിന് അപ്പുറം സ്ഥിതി ചെയ്യുന്നതിനാല് അടച്ചു പൂട്ടാത്ത പാറക്കണ്ടിയിലെ ഏക ബീവറേജ്സ് ഔട്ട്ലെറ്റിലേക്ക് ഇന്നലെ ജനം ഒഴുകിയെത്തിയത്. ഒന്നിന് എല്ലാ മദ്യശാലകള്ക്ക് അവധിയായതും നഗരത്തില് ദേശീയപാതയോരത്ത് പ്രവര്ത്തിച്ചിരുന്ന ബീവറേജ്സ് ഔട്ട്ലെറ്റുകള് അടച്ചു പൂട്ടിയതും പുതിയതെരു, തളിപ്പറമ്പ് ഉള്പ്പെടെ പല സ്ഥലങ്ങളിലുമുളള ഔട്ട്ലെറ്റുകള് അടച്ചു പൂട്ടിയതും കാരണം മദ്യം ആവശ്യമുളളവര് ഒന്നാകെ ഞായറാഴ്ച ദിവസമായ ഇന്നലെ പാറക്കണ്ടിയിലേക്ക് എത്തിച്ചേര്ന്നതോടെ ക്യൂ പഴയ ബസ്സ് സ്റ്റാന്റിന് സമീപമുളള അണ്ടര് ബ്രിഡ്ജ് വരെ നീണ്ടു. ഇതിനിടയില് മദ്യം വാങ്ങാനെത്തിയവര് തമ്മില് ഉന്തും തളളും നടന്നതോടെ ഒരു ഘട്ടത്തില് പോലീസിന് ലാത്തി പ്രയോഗിച്ച് വാങ്ങാനെത്തിയവരെ നിയന്ത്രിക്കേണ്ടി വന്നു.
നഗരത്തില് കാല്ടെക്സില് പ്രവര്ത്തിച്ച രണ്ടു മദ്യശാലകളും ധനലക്ഷ്മി ആശുപത്രിക്ക് സമീപമുളള ഒന്നുമാണ് അടച്ചു പൂട്ടിയത്. ധനലക്ഷ്മി ആശുപത്രിക്ക് സമീപമുളളത് കേളകത്തേക്ക് മാറ്റി സ്ഥാപിച്ചെങ്കിലും കാല്ടെക്സിലെ രണ്ടും ഇതുവരെ മാറ്റി പ്രവര്ത്തനമാരംഭിച്ചില്ല. ഒന്ന് നേതാജി റോഡില് ആരംഭിക്കാന് തീരുമാനിച്ചിട്ടുണ്ട്. രണ്ടാമത്തേത് എവിടെ സ്ഥാപിക്കുമെന്നതിനേ കുറിച്ച് ധാരണയായിട്ടില്ല എന്നാണ് അറിയുന്നത്. നേതാജി റോഡില് ആരംഭിക്കുന്നതിനെതിരേയും പ്രതിഷേധം ഉയര്ന്നിട്ടുണ്ട്. പുതിയതെരുവിലേത് ഉള്പ്പെടെ ജില്ലയിലെ പൂട്ടിയ പല ഔട്ട്ലെറ്റുകളും തുറക്കുന്നത് മാറ്റി സ്ഥാപിക്കാന് ആലോചിക്കുന്ന സ്ഥലങ്ങളിലെ ജനങ്ങളുടെ എതിര്പ്പിനെ തുടര്ന്ന് അനിസശ്ചിതത്വത്തിലായിരിക്കുകയാണ്. കോടതി വിധി കളളുഷാപ്പുകള്ക്ക് ബാധകമായതിനാല് സംസ്ഥാന പാതകള് കടന്നു പോകുന്ന ഗ്രാമീണ മേഖലയിലെ പല കളളുഷാപ്പുകളുടെ പ്രവര്ത്തനവും നിലച്ചിരിക്കുകയാണ്. ഇത് ഗ്രാമീണരായ മദ്യപാനികളേയും പ്രതിസന്ധിയിലാക്കിയിരിക്കുകയാണ്.
