ചങ്ങനാശ്ശേരി: ബോട്ടുജെട്ടിയെ ടൂറിസം ബോട്ടുജെട്ടിയാക്കി മാറ്റുന്നതിനും സൗന്ദര്യവല്ക്കരണം നടത്തുന്നതിനുമുള്ള വിശദമായ പദ്ധതി തയ്യാറാക്കുന്നതിനുള്ള ആലോചനായോഗം നടത്തി. ഒരുകോടി രൂപ ചെലവഴിച്ചാണ് പദ്ധതിയുടെ ആദ്യഘട്ടം നടപ്പാക്കുന്നത്.
ബോട്ടുജെട്ടികുളം മുതല് ആലപ്പുഴ ബോട്ട് റൂട്ട് കനാലായ തുരുത്തേല് വരെയാണ് ആദ്യപടിയായി സൗന്ദര്യവല്ക്കരണം നടത്തുന്നത്. സി.എഫ്. തോമസ് എംഎല്എയുടെ അധ്യക്ഷതയില് ബോട്ട് ജെട്ടിയില് കൂടിയ യോഗത്തില് കെഐഐഡിസിജനറല് മാനേജര് അബ്ദുള് റഷീദ്, പ്രോജക്ട് ആര്കിടെക്ട് ടോണി എന്നിവര് പങ്കെടുത്തു. ചങ്ങനാശ്ശേരി ബോട്ട് ജെട്ടിയും പരിസരവും നവീകരിച്ചു വൃത്തിയായി സംരക്ഷിക്കണമെന്നും കുളത്തിനു ചുറ്റും അലങ്കാര ദീപങ്ങളും ഇരിപ്പിട സൗകര്യവും ഒരുക്കി ആകര്ഷീയണമാക്കണമെന്നും കെസിപാലം തടസം സൃഷ്ടിക്കാത്ത ശിക്കാരവള്ളങ്ങളും പെഡല്ബോട്ടുകളും ക്രമീകരിക്കണം. സ്ത്രീകള്ക്കും കുട്ടികള്ക്കും വയോജനങ്ങള്ക്കും പ്രയോജനപ്പെടുന്ന തരത്തിലുള്ള സംവിധാനങ്ങളും റസ്റ്റ് റൂമുകളും ബോട്ട്ജെട്ടിയില് ക്രമീകരിക്കണം. ഡിടിപിസിയുമായി ചേര്ന്ന് ആരാധനാലയങ്ങളെ ബന്ധപ്പെടുത്തിയുള്ള ബോട്ട് സര്വീസുകള് ക്രമീകരിക്കണം. ചങ്ങനാശ്ശേരിയിലേക്കു ഹൗസ്ബോട്ടുകളും ഉയരംകൂടിയ ബോട്ടുകളും എത്തുന്നതിനു തടസമായി നില്ക്കുന്ന കെസിപാലം ഉയര്ത്തുന്നതുവരെ കാത്തു നില്ക്കാതെ ചങ്ങനാശ്ശേരിയിലെ ടൂറിസം പദ്ധതികള്ക്കു തുടക്കം കുറിക്കണം. പ്രാഥമിക ആവശ്യങ്ങള് നിര്വഹിക്കുന്നതിനു സൗകര്യം ഒരുക്കണം. നഗരാതിര്ത്തിയിലുള്ള എല്ലാ തോടുകളെയും ബന്ധപ്പെടുത്തി ജലപാതയൊരുക്കണം. എംസിറോഡില് ളായിക്കാട്, മനയ്ക്കച്ചിറ പുത്തനാര്, ചെത്തിപ്പുഴക്കടവ്, കോട്ടയം തോട് എന്നിവയെ ബന്ധപ്പെടുത്തണം. വീക്കന്റുകളില് ബോട്ട് വിനോദയാത്ര ക്രമീകരിക്കണം. വാഴപ്പള്ളി തുരുത്തേല്പ്പാലം എന്നീ സ്ഥലങ്ങളില് കനാലിനോടു ചേര്ന്നു കിടക്കുന്ന സ്ഥലങ്ങളില് നാലുമണിക്കാറ്റ് സൗകര്യം ക്രമീകരിക്കണം തുടങ്ങി നിരവധി നിര്ദ്ദേശങ്ങള് യോഗത്തില് ഉയര്ന്നു. നഗരസഭാ അധ്യക്ഷന് സെബാസ്റ്റിയന് മാത്യു മണമേല്, വൈസ് ചെയര്പേഴ്സണ് സുമ ഷൈന്, നഗരസഭ പ്രതിപക്ഷ നേതാവ് മര്ച്ചന്റ്സ് അസോസിയേഷന് പ്രസിഡന്റ് സതീഷ് വലിയവീടന്, സാംസണ് വലിയപറമ്പില്, വിവിധ വകുപ്പ് മേധാവികള്, നഗരസഭ കൗണ്സിലര്മാര്, വിവിധ രാഷ്ട്രീയ കക്ഷി നേതാക്കന്മാര്, ജനപ്രതിനിധികള് തുടങ്ങിയവര് യോഗത്തില് പങ്കെടുത്തു.
