പാലാ: പൈകയില് ഇപ്പോള് പ്രവര്ത്തിച്ചുകൊണ്ടിരിക്കുന്ന ബിവറേജസ് കോര്പ്പറേഷന്റെ മദ്യവില്പ്പനശാല ഇടമറ്റം ചീങ്കല്ല് ഭാഗത്ത് ആരംഭിക്കുവാനുള്ള ശ്രമം യാതൊരു കാരണവശാലും അനുവദിക്കില്ലെന്ന് മീനച്ചില് ഗ്രാമപഞ്ചായത്ത് പ്രസിഡന്റും സമരസമിതി കണ്വീനറുമായ റെനി ബിജോയി പത്രസമ്മേളനത്തില് അറിയിച്ചു.
ജനസാന്ദ്രതയുള്ളതും നിരവധി വിദ്യാഭ്യാസ സ്ഥാപനങ്ങളും ആരാധനാലയങ്ങളുമുള്ളതുമായ ഇടമറ്റം-ചീങ്കല്ല് ഭാഗത്ത് വിദേശമദ്യഷാപ്പ് ആരംഭിക്കരുതെന്ന് 2015 ഡിസംബര് 16ന് ഗ്രാമപഞ്ചായത്ത് കമ്മറ്റി ഏകകണ്ഠമായി തീരുമാനിച്ചിട്ടുള്ളതാണ്. ആറ് സ്കൂളുകളുടെ അധികാരികളും സാമൂഹ്യ സാമുദായിക സംഘടനകളും ഇതേ ആവശ്യം ഉന്നയിച്ച് എക്സൈസ് അധികൃതര്ക്ക് പരാതി നല്കിയിട്ടുണ്ട്്. മീനച്ചില് പഞ്ചായത്തിലെ മിക്കവാറും എല്ലാ സര്ക്കാര് ഓഫീസുകളും മറ്റു പൊതു സ്ഥാപനങ്ങളും പ്രവര്ത്തിക്കുന്നത് ഇടമറ്റത്താണ്. ഇപ്പോള് തന്നെ ചീങ്കല്ല് ഭാഗം റോഡ് ഇടുങ്ങിയതും തിരക്കേറിയതുമാണ്. മദ്യശാലകൂടി വന്നാല് ഈ റോഡിലൂടെയുള്ള യാത്ര കൂടുതല് ദുഷ്ക്കരമാവുകയും അപകടങ്ങളും ഉണ്ടാകും. പഞ്ചായത്ത് രാജ് നിയമത്തിലെ 232-ാം വകുപ്പു പ്രകാരം പഞ്ചായത്തിന്റെ അനുമതിയും ലൈസന്സും വാങ്ങാതെ മദ്യശാല പ്രവര്ത്തിപ്പിക്കുവാന് നിലവില് കഴിയില്ലെന്നും സമരസമിതി കണ്വീനര് ചൂണ്ടിക്കാട്ടി.
