പയ്യന്നൂര്‍: രാമന്തളിയിലെ കിണറുകള്‍ മലിനപ്പെടുത്തുന്ന നാവിക അക്കാദമിയുടെ മാലിന്യ പ്ലാന്റ് അടച്ചു പൂട്ടണമെന്നാവശ്യപ്പെട്ട് ജനആരോഗ്യ സംരക്ഷണ സമിതി അക്കാദമി പയ്യന്നൂര്‍ഗെയിറ്റിനു മുന്നില്‍ നടത്തിവരുന്ന അനിശ്ചിതകാല സമരം ഇരുപത്തി ഏഴാം നാളിലേക്ക് കടന്നു. സമരസമിതി വൈസ് ചെയര്‍മാന്‍ പി.കെ. നാരായണന് സമരപന്തലില്‍ ആരംഭിച്ച അനിശ്ചിതകാല നിരാഹാര സമരം 3 ദിവസം പിന്നിട്ടു. നിരാഹാര സമരത്തിന് അഭിവാദ്യമര്‍പ്പിച്ച് സ്വാതന്ത്രസമര സേനാനി വി.പി. അപ്പുക്കുട്ട പൊതുവാള്‍ സമരപന്തല്‍ സന്ദര്‍ശിച്ച് അഭിവാദ്യ പ്രസംഗം നടത്തി.
നിരാഹാര സമരത്തിന് ഐക്യദാര്‍ഢ്യം പ്രകടിപ്പിച്ച് ഗംഗന്‍ കുഞ്ഞിമംഗലം സമരപന്തലില്‍ ഏകദിന ഉപവാസം നടത്തി. അപ്പുക്കുട്ട പൊതുവാള്‍ നല്‍കിയ നാരങ്ങനീര് കുടിച്ച് ഗംഗന്‍ കുഞ്ഞിമംഗലം വൈകുന്നേരം ഉപവാസം അവസാനിപ്പിച്ചു. നിരാഹാരമനുഷ്ഠിക്കുന്ന പി കെ നാരായണന് അഭിവാദ്യമര്‍പ്പിച്ച് ജനആരോഗ്യ സംരക്ഷണ സമിതി പ്രവര്‍ത്തകര്‍ രാമന്തളി സെന്‍ട്രലില്‍ പ്രകടനം നടത്തി.
