ശ്രീകണ്ഠാപുരം: ടിപ്പര്‍ ലോറികള്‍ അടക്കമുള്ള വാഹനങ്ങളുടെ ചീറിപ്പായല്‍ ജില്ലയിലെ റോഡുകളെ കുരുതുക്കളമാക്കുന്നു. ചെറുതും വലുതുമായ നൂറുകണക്കിന് ലോറികളാണ് ജില്ലയിലെ റോഡുകളിലൂടെ ചീറിപ്പായുന്നത്. ഇവയുടെ മരണപ്പാച്ചിലില്‍ നിരവധി പേര്‍ റോഡുകളില്‍ പിടഞ്ഞുവീണ് മരിച്ചുകഴിഞ്ഞു. കഴിഞ്ഞ ഏതാനും ദിവസങ്ങളിലായി ശ്രീകണ്ഠാപുരം കോട്ടൂരിലും മട്ടന്നൂര്‍ പഴശ്ശിയിലും രണ്ട് ബൈക്ക് യാത്രികരാണ് ലോറിയിടിച്ച് ദാരുണമായി മരിച്ചത്. ഇരിക്കൂര്‍, ബ്ലാത്തൂര്‍, ശ്രീകണ്ഠാപുരം, ചേപ്പറമ്പ്, ഉളിക്കല്‍ തുടങ്ങി മലയോര പ്രദേശങ്ങളിലെ ചെങ്കല്‍പ്പണകളില്‍ നിന്നും ചെങ്കല്ലുകളുമായി ആയിരത്തോളം ചെറിയ ലോറികള്‍ ദിനംപ്രതി സര്‍വ്വീസ് നടത്തുന്നുണ്ട്. ഇവിടെയെല്ലാം ചെങ്കല്ല് ലോഡിങ്ങ് തൊഴിലാളികള്‍ തന്നെയായിരിക്കും ഡ്രൈവര്‍മാര്‍. കല്ല് കയറ്റി തളര്‍ന്ന അവശരാകുന്ന ഇവര്‍തന്നെ ലോറികള്‍ ഡ്രൈവ് ചെയ്യുന്നത് അപകടങ്ങള്‍ക്ക് കാരണമാകുന്നതായി പറയുന്നു. പോലീസ് പരിശോധനകള്‍ മുറപോലെ നടക്കുന്നുണ്ടെങ്കിലും ഇത്തരക്കാര്‍ക്കെതിരെ നടപടിയെക്കാന്‍ പോലീസിന് സാധിക്കുന്നില്ല. കൂടുതല്‍ ട്രിപ്പ് എടുത്താന്‍ ലാഭവിഹിതം ഉയരുമെന്നതിനാല്‍ റോഡുകളിലൂടെ മരണപ്പാച്ചില്‍ നടത്തിയും ലാഭമുണ്ടാക്കാന്‍ തൊഴിലാളികളും ശ്രമിക്കുന്നു. ക്വാറികളില്‍ നിന്നും മെറ്റലും മറ്റും കയറ്റുന്ന കൂറ്റന്‍ വാഹനങ്ങളും അപകടത്തിന് കാരണമാകുന്നു. അതിവേഗത്തിലോടുന്ന വലിയ വാഹനങ്ങളെ മറികടക്കാന്‍ ചെറുവാഹനങ്ങള്‍ ശ്രമിക്കുന്നതാണ് അപകടകാരണമായിത്തീരുന്നത്.
കഴിഞ്ഞ ഇരുപത് ദിവസത്തിനുള്ളില്‍ പത്തിലേറെപ്പേര്‍ ജില്ലയില്‍ വാഹനാപകടത്തില്‍ മരണപ്പെട്ടിട്ടുണ്ട്. ഇതിലേറെയും ബൈക്ക് യാത്രക്കാരാണ്. അപകടങ്ങളില്‍ പരിക്കേറ്റവരും ഏറെയാണ്.
തലശ്ശേരി-കൂട്ടുപുഴ, ചെറുപുഴ-ആലക്കോട്-പയ്യാവൂര്‍-ഉളിക്കല്‍ റോഡിന്റെ പുനര്‍ നിര്‍മ്മാണപ്രവൃത്തികള്‍ നടക്കുന്നതിനാല്‍ ഗതാഗത തടസ്സമുണ്ടാകുന്നത് ഇപ്പോള്‍ നിത്യസംഭവമാണ്. ഇത് മറികടക്കാനായി ബസ്സുകള്‍ മത്സരഓട്ടമാണ് റോഡില്‍ നടത്തുന്നത്. ബസ്സുകളുടെ മത്സരഓട്ടം തടയാന്‍ പോലീസിന്റെ ഭാഗത്തു നിന്ന് ശക്തമായ നടപടികളുണ്ടാകില്ലെന്ന് നാട്ടുകാര്‍ പരാതിപ്പെടുന്നു.
