കഴക്കൂട്ടം: ടെക്്നോ നഗരമായ കഴക്കൂട്ടത്ത് മലിനജലം ഒഴുക്കിവിടാനുള്ള പൈപ്പ് സ്ഥാപിക്കുന്നതിനു വേണ്ടി കുഴി എടുക്കുന്നതിനിടയില് ബിഎസ്എന്എല്ലിന്റെ വലിയ കേബിള് പൊട്ടിയതിനാല് കഴക്കൂട്ടത്തെയും പരിസര പ്രദേശങ്ങളിലേതുമായ അയ്യായിരത്തില് കൂടുതല് ടെലഫോണ് ബന്ധം നിശ്ചലമായി.
കഴക്കൂട്ടത്തും പരിസരങ്ങളിലുമായി പ്രവര്ത്തിക്കുന്ന സര്ക്കാര്-അര്ദ്ധസര്ക്കാര് സ്ഥാപനങ്ങളും ആശുപത്രികളുള്പ്പെടെ മറ്റ് സ്വകാര്യ സ്ഥാപനങ്ങള്, പോലീസ് സ്റ്റേഷന് എന്നിവിടങ്ങളിലേതുള്പ്പെടെ അത്യാവശ്യ സര്വ്വീസുകളെല്ലാം നിശ്ചലമായിരിക്കുകയാണ്. കഴക്കൂട്ടം ജംഗ്ഷനിലാണ് മലിനജലം ഒഴുക്കിവിടാന് പുതുതായി പൈപ്പിടുന്നത്്. ഓടകളില് നിന്ന് വരുന്ന മലിനജലം പലപ്പോഴും നിറഞ്ഞ് റോഡിലേയ്ക്ക് ഒഴുകാറുണ്ട്. ഇതിന് പരിഹാരമായി ദേശീയ പാത മുറിച്ച് മലിനജലം ഒഴുക്കിവിടുന്ന പൈപ്പിടല് പണി തുടങ്ങിയത്. ദേശീയപാത ബൈപ്പാസ് നിര്മ്മാണ ജോലികള് നടത്തുന്ന കമ്പനിയാണ് ജോലി നടത്തിയത്.
കാര്യവട്ടം ടെലഫോണ് എക്സ്ചേഞ്ചില് നിന്ന് കഴക്കൂട്ടം ഭാഗത്തേയ്ക്കുള്ള പ്രധാന ലൈനുകളാണ് മുറിഞ്ഞത്. ഞായറാഴ്ച മുതല് തന്നെ കേബിളുകള് നന്നാക്കുവാനുള്ള പണികള് ആരംഭിച്ചുവെങ്കിലും പകുതിപോലും ഇതുവരെ പുന:സ്ഥാപിക്കുവാന് ആയിട്ടില്ല. പൂര്ണ്ണമായും ടെലഫോണ്,ഇന്റര്നെറ്റ് ബന്ധം പുന:സ്ഥാപിക്കണമെങ്കില് ഇനിയും മൂന്ന് ദിവസമെങ്കിലും വേണ്ടി വരുമെന്നാണ് ബിഎസ്എന്എല് അധികൃതര് പറയുന്നത്.
റോഡ് മുറിച്ച് പൈപ്പ് സ്ഥാപിക്കുന്ന വിവരം ബിഎസ്എന്എല് അധികൃതരെ അറിയിച്ചില്ലെന്നും പരാതിയുണ്ട്. കേബിള് മുറിഞ്ഞതിനാല് കഴക്കൂട്ടത്തെയും, പരിസര പ്രദേശങ്ങളിലെയും ഭൂരിഭാഗം വീടുകളിലെയും ലാന്റ് ഫോണുകള് നിശ്ചലമായിരിക്കുകയാണ്. കൂടാതെ സമീപത്തെ ബാങ്കുകളെയും, ആര്ടി ഓഫീസിന്റെയും ഫോണുകളും നിശ്ചലമായിരിക്കുകയാണ്. കേബിളിന്റെ പണികള് നടക്കുന്നതിനാല് കഴക്കൂട്ടത്തുനിന്നും ശ്രീകാര്യത്തേയ്ക്കുള്ള റോഡില് ഒരു വശത്തു കൂടി മാത്രമാണ് വാഹനങ്ങള് കടത്തിവിടുന്നത് ഇതിനാല് ഗതാഗതക്കുരുക്കും അനുഭവപ്പെടുന്നുണ്ട്. കേബിളുകള് മുറിഞ്ഞത് ടെക്നോപാര്ക്കിന്റെ പ്രവര്ത്തനത്തെ ബാധിച്ചിട്ടില്ല. കാര്യവട്ടത്ത് നിന്ന് ടെക്നോപാര്ക്ക് കഴിഞ്ഞാണ് കഴക്കൂട്ടം ഭാഗത്തെ കേബിള് വരുന്നത് അതിനാല് കഴക്കൂട്ടത്തിനു മുമ്പുള്ള സ്ഥലമായതിനാല് ടെക്നോപാര്ക്കിലെ ലാന്റ് ഫോണുകളുടെയും ഇന്റര്നെറ്റുകളുടെയും പ്രവര്ത്തനത്തെ ബാധിച്ചിട്ടില്ല.
