പാലാ: ബഹിരാകാശ ഗവേഷണങ്ങളില്‍ പാലാക്കാരിയുടെ സേവനത്തിന് കേന്ദ്ര സര്‍ക്കാരിന്റെ അംഗീകാരം. അന്താരാഷ്‌ട്ര വനിതാ ദിനത്തോടനുബന്ധിച്ച് ഭാരത സര്‍ക്കാര്‍ ഏര്‍പ്പെടുത്തിയിരിക്കുന്ന നാരി ശക്തി 2016 പുരസ്‌കാറിന് പാലാ കിഴക്കേക്കര അനറ്റ സോണിയാണ് അര്‍ഹയായത്. ഒരു ലക്ഷം രൂപയും പ്രശസ്തി പത്രവുമടങ്ങുന്ന അവാര്‍ഡ് കഴിഞ്ഞ 8ന് ഡല്‍ഹിയില്‍ നടന്ന ചടങ്ങില്‍ രാഷ്‌ട്രപതി പ്രണബ് മുഖര്‍ജിയില്‍ നിന്ന് സ്വീകരിച്ചു.
പാലാ സ്വദേശിനിയായ അനറ്റയാണ് ചന്ദ്രയാന്‍, മംഗള്‍യാന്‍ തുടങ്ങിയ ഇന്ത്യയുടെ അഭിമാനനേട്ടങ്ങള്‍ക്ക് വഴികാട്ടിയായത്. ഉപഗ്രങ്ങളുമായി പറക്കുന്ന പേടകത്തിന്റെ ഗതി നിര്‍ണ്ണയും ഭ്രമണപഥം നിയന്ത്രിക്കല്‍, ദിശ മാറ്റല്‍ തുടങ്ങിയ പ്രവര്‍ത്തനങ്ങള്‍ക്ക് നേതൃത്വം നല്‍കിയത്. പാലാ സെന്റ് തോമസ് കോളേജില്‍ നിന്ന് എംഎസ്.സി മാത്സിന് ബിരുദം നേടി. ഇതിന് ശേഷം 1987 മുതലാണ് ഐഎസ്ആര്‍ഒയില്‍ ശാസ്ത്രജ്ഞയായി സേവനമനുഷ്ഠിച്ചു തുടങ്ങിയത്. ബാംഗ്ലൂര്‍ ബഹിരാകാശ കേന്ദ്രത്തില്‍ ഫ്‌ളൈറ്റ് ഡൈനമിക്‌സ് ഗ്രൂപ്പില്‍ എല്‍ഇഒ വിഭാഗത്തിന്റെ ഹെഡും ഡെപ്യൂട്ടി പ്രൊജക്ട് ഡയറക്ടറുമാണ് ഇപ്പോള്‍ അനറ്റ. മംഗളയാന്‍, ചന്ദ്രയാന്‍ എന്നിവ ഭ്രമണപഥത്തില്‍ എത്തിക്കുന്നതില്‍ അനറ്റ പ്രധാന പങ്ക് വഹിച്ചിരുന്നു.
ഐഎസ്ആര്‍ഒയുടെ അസ്‌ട്രോ നോട്ടിക്കല്‍ സൊസൈറ്റി ഏര്‍പ്പെടുത്തിയ മികച്ച സേവനത്തിനുളള അവാര്‍ഡ,് ചന്ദ്രയാന്‍ ടീംവര്‍ക്കിന്റെ അവാര്‍ഡ് എന്നിവയും ഈ ശാസ്ത്രജ്ഞയെ തേടിയെത്തിയിട്ടുണ്ട്. പാലാ വെളളരിങ്ങാട്ട് റിട്ട.പ്രഫ. വി.കെ.സെബാസ്റ്റ്യന്റെ മകളും പാലാ കിഴക്കേക്കര റിട്ട. സൗത്ത് ഇന്ത്യന്‍ ബാങ്ക് മാേനജര്‍ സണ്ണി ചെറിയാന്റെ ഭാര്യയുമാണ് അനറ്റ സോണി. അഖില്‍, നിഖില്‍ എന്നിവരാണ് മക്കള്‍.
