നെടുമ്പാശ്ശേരി: കൊച്ചി അന്താരാഷ്ട്ര വിമാനത്താവളത്തിലെ പുതിയ രാജ്യാന്തര ടെര്മിനലിലേയ്ക്ക് സിഐഎസ്എഫിന്റെ 360 ഭടന്മാര് എത്തുന്നു. ടി3 യുടെ പ്രവര്ത്തനത്തിന്റെ ഭാഗമായാണ് കേന്ദ്ര വ്യവസായ സംരക്ഷണസേന (സി.ഐ.എസ്.എഫ്) യുടെ 360 ഭടന്മാരെ കൂടി നിയമിക്കാന് കേന്ദ്ര ആഭ്യന്തര മന്ത്രാലയം ഉത്തരവിട്ടത്. ഇതോടുകൂടി കൊച്ചി വിമാനത്താവളത്തല് സിഐഎസ്എഫ് സേനാബലം 854 ആയി ഉയരും.
നിലവില് കമാന്ഡന്റ് ആണ് കൊച്ചി വിമാനത്താവളത്തിലെ സിഐഎസ്എഫ് യൂണിറ്റിന്റെ തലവന്. സീനയര് കമാന്ഡന്റ് റാങ്കിലുള്ള ഉേദ്യാഗസ്ഥനാണ് ഈ സ്ഥാനത്തുള്ളതെങ്കിലും തസ്തിക അനുവദിക്കപ്പെട്ടിരുന്നില്ല. അംഗബലം കൂടുന്നതോടെ സീനിയര് കമാന്ഡന്റ് തസ്തിക കേന്ദ്ര സര്ക്കാര് അനുവദിച്ചിട്ടുണ്ട്. ഇതിനു പുറമെ ഒരു ഡെപ്യൂട്ടി കമാന്ഡന്റ് തസ്തികയും മൂന്ന് അസിസ്റ്റന്റ് കമാന്ഡന്റ് തസ്തികയും (ആകെ ആറ് ) അധികമായി അനുവദിച്ചു.
16 ഇന്സെപ്കടര് (25), 35 സബ് ഇന്സ്പെക്ടര് (138) എന്നിവയുള്പ്പെടെയാണ് 360 പേരെ ഇപ്പോള് കൊച്ചി വിമാനത്താവളത്തിനായി കേന്ദ്ര സര്ക്കാര് അധികമായി അനുവദിച്ചിട്ടുള്ളത്. നിയമപ്രകാരം, ഇവരുടെ മൂന്ന് മാസത്തെ ശമ്പളത്തിന് തത്തുല്യ തുകയായ 4.61 കോടി രൂപ ഇതിനോടകം തന്നെ സിയാല് നല്കി.
ഇവര്ക്കുള്ള താമസ സൗകര്യം ഒരുങ്ങുകയാണ്. ഇവരില് ഭൂരിഭാഗം പേരും അഞ്ച് സംസ്ഥാനങ്ങളിലെ തിരഞ്ഞെടുപ്പ് ഡ്യൂട്ടികളിലായിരുന്നു. 150 പേരുടെ ആദ്യ സംഘത്തെ അടിയന്തരമായി കൊച്ചിയിലെത്തിക്കാനുള്ള നടപടിയെടുത്തിട്ടുണ്ട്. അടുത്താഴ്ച്ചയോടെ ഇവര് ടി 3 യുടെ സുരക്ഷാ ജോലി ഏറ്റെടുക്കും.
