നാഗര്കോവില്: കന്യാകുമാരി പാര്ലമെന്റ് അംഗവും കേന്ദ്ര ഉപരിതല ഗതാഗതവകുപ്പ് സഹമന്ത്രിയുമായ പൊന് രാധാകൃഷ്ണന്റെ ആവശ്യം കേന്ദ്ര റയില്വെ മന്ത്രി സുരേഷ് പ്രഭു അംഗീകരിച്ചു. തിരുച്ചിറപ്പള്ളി-തിരുനെല്വേലി ഇന്റര്സിറ്റി എക്സ്പ്രസ് തീവണ്ടിയെ കേരളത്തിന്റെ തലസ്ഥാനമായ തിരുവനന്തപുരത്തേക്ക് നീട്ടിണമെന്ന ആവശ്യമാണ് നടപ്പിലാക്കി ഉത്തരവ് പുറപ്പെടുവിച്ചിരിക്കുന്നത്. ജൂലൈ 15 മുതല് ഈ തീവണ്ടി തിരുവനന്തപുരത്ത് എത്തിച്ചേരും. രാവിലെ 7.05ന് തിരുച്ചിറാപ്പളളയില് നിന്നും പുറപ്പെടുന്ന തീവണ്ടി മധൂര വഴി 12.35ന് തിരുനെല്വേലിയില് എത്തും. തുടര്ന്ന് വള്ളിയൂര്, നാഗര്കോവില് ടൗണ്, കുഴിത്തുറ എന്നിവിടങ്ങളില് നിറുത്തി ഉച്ചക്ക് 3.25ന് തിരുവനന്തപുരം സെന്ട്രല് സ്റ്റേഷനിലെത്തും.
തിരുവനന്തപുരത്തുനിന്നു രാവിലെ 11.55ന് തിരുച്ചിറാപ്പളളിയിലേക്ക് യാത്ര പുറപ്പെടും. തിരുച്ചിറാപ്പള്ളി പാതയില് വാഞ്ചിമണിയാച്ചി, കോവില്പെട്ടി, സാത്തൂര്, വിരുദുനഗര്, മധൂര, ഡിണ്ടിക്കല്, മണപ്പാറ എന്നിവിടങ്ങളില് നിറുത്തും. തിരുവനന്തപുരത്തു നിന്ന് രാവിലെ 11.55ന് പുറപ്പെടുന്ന തീവണ്ടി വൈകിട്ട് 5.25ന് മധുരയിലും രാത്രി 8.15ന് തിരുച്ചിറാപ്പള്ളിയിലും എത്തിച്ചേരും. ഒരു എസി ചെയര്കാര്, ഏഴ് സെക്കന്ഡ് ക്ലാസ് സിറ്റിങ്, എട്ട് ജനറല് കോച്ചുകള്, ലഗേജ് വാനുകള് ഉള്പ്പെടെ 18 കോച്ചുകള് ഉണ്ടായിരിക്കും. ജൂലൈ 15ന് തിരുവനന്തപുരത്തു നടക്കുന്ന ഉദ്ഘാടന ചടങ്ങില് പൊന് രാധാകൃഷ്ണന് ഉള്പ്പെയുള്ള കേന്ദ്രമന്ത്രിമാര് പങ്കെടുക്കും.
