പാലാ: ബസ്സില്നിന്നും യാത്രക്കാരന് തെറിച്ചു വീണത് ശ്രദ്ധയില്പ്പെടുത്തിയ സാമൂഹ്യ പ്രവര്ത്തകനോട് അപമര്യാദയായി പെരുമാറുകയും അപകടത്തില്പ്പെട്ട യാത്രക്കാരനെ ശ്രദ്ധിക്കാതെ ബസുമായി പോകുകയും ചെയ്ത ബസ് ഡ്രൈവര്ക്കെതിരെ വ്യാപക പ്രതിക്ഷേധം. കഴിഞ്ഞ ദിവസം രാവിലെ മുനിസിപ്പല് കോംപ്ലെക്സിനു മുന്നിലെ വെയ്റ്റിംഗ് ഷെഡിനു സമീപമാണ് സംഭവം നടന്നത്. കോട്ടയത്തുനിന്നും ഈരാറ്റുപേട്ടയ്ക്ക് പോയ കുഴിത്തോട്ട് ബസ് വെയറ്റിംഗ് ഷെഡിനു മുന്നില് നിന്നും അലക്ഷ്യമായി മുന്നോട്ട് എടുത്തപ്പോഴാണ് യാത്രക്കാരന് വഴിയിലേക്ക് തെറിച്ചു വീണത്. ആളുകള് വഴിയില് വീണ യാത്രക്കാരനെ സഹായിക്കുന്നതിനിടെ ഈ വഴി കടന്നു വന്ന മഹാത്മാഗാന്ധി നാഷണല് ഫൗണ്ടേഷന് ചെയര്മാന് എബി ജെ. ജോസ് ബസ് ഡ്രൈവറെ അപകടം വിവരം ധരിപ്പിച്ചപ്പോള് അപമര്യാദയായി പെരുമാറുകയും അസഭ്യം പറഞ്ഞുകൊണ്ട് അപകടത്തില്പ്പെട്ടയാളെ ശ്രദ്ധിക്കപോലും ചെയ്യാതെ ബസുമായി പോകുകയുമായിരുന്നു. ബസ് ജീവനക്കാരന്റെ നടപടി എബി ജെ. ജോസ് സോഷ്യല് മീഡിയയില് പങ്കുവച്ചതോടെ ആയിരക്കണക്കിനാളുകള് പ്രതിഷേധമറിച്ചു. ആരോപണ വിധേയമായ ബസിന്റെ വിവിധ സര്വീസുകളെക്കുറിച്ചു വ്യാപകമായ പരാതികളാണ് ആളുകള് സോഷ്യല് മീഡിയായിലൂടെ പങ്കുവച്ചത്.
ഡ്രൈവറുടെ നടപടിക്കെതിരെ നടപടി ആവശ്യപ്പെട്ട് ഗതാഗത വകുപ്പ് മന്ത്രി, ട്രാന്സ്പോര്ട്ട് കമ്മീഷണര് എന്നിവര്ക്ക് എബി ജെ. ജോസ് പരാതി നല്കി.
ഡ്രൈവറുടെ നടപടിക്കെതിരെ വിവിധ സംഘടനകള് പ്രതിക്ഷേധിച്ചു. യാത്രക്കാരുടെ സുരക്ഷ നോക്കാതെ ഓടുന്ന ബസ് സര്വീസുകള്ക്ക് എതിരെ പോലീസ് നിഷ്ക്രിയത്വം പാലിക്കുകയാണെന്ന് സംഘടനകള് ആരോപിച്ചു. ഹെല്മെറ്റും സീറ്റ് ബല്റ്റും ധരിക്കാത്തവരെ പിടിക്കാന് 24 മണിക്കൂറും പ്രവര്ത്തിക്കുന്ന പോലീസ് ഇത്തരം കാര്യങ്ങളില് ശ്രദ്ധിക്കുന്നില്ലെന്നും സംഘടനകള് കുറ്റപ്പെടുത്തി. സാംജി പഴേപറമ്പില് അദ്ധ്യക്ഷത വഹിച്ചു. മുനിസിപ്പല് കൗണ്സിലര് ടോണി തോട്ടം, ആര്. മനോജ്, ടി. ആര്. നരേന്ദ്രന്,അഡ്വ. സന്തോഷ് മണര്കാട്,ആല്ബിന് ജോസഫ്, അനില് വി. നായര്, ബിനു പെരുമന തുടങ്ങിയവര് പ്രസംഗിച്ചു.
