മുണ്ടക്കയം :കൊക്കോ മോഷണകേസില് പൊലീസ് അറസ്റ്റ് ചെയ്തയാള് ബൈക്ക് മോഷണ കേസിലും പ്രതി. പാലൂര്ക്കാവ് സ്വദേശിയായ സജിത്തിന്റെ വീട്ടില് നിന്നും 100 കിലോയിലധികം കൊക്കോ മോഷ്ടിച്ച സംഭവത്തില് പൊലീസ് നടത്തിയ അന്വേഷണത്തിനിടെ പൊന്കുന്നത്ത് കടയില് കൊക്കോ വില്ക്കുവാന് ശ്രമിച്ച തിരുവനന്തപുരം സ്വദേശി മണ്ണന്തല വിജയകുമാര്(47)നെയാണ് പിടികൂടിയത്. പെരുവന്താനം സ്വദേശി മണികണ്ഠന് എന്ന് വിളിക്കുന്ന മനോജ്, കാഞ്ഞിരപ്പള്ളി സ്വദേശി ജയേഷ് കുഞ്ഞുമോന് എന്നിവര്ക്കായി തെരച്ചില് ശക്തമാക്കിയിടട്ടുണ്ട്.്. വിജയകുമാറിനെ കൂടുതലായി ചോദ്യം ചെയ്തപ്പോഴാണ് ഇയാള് ഇപ്പോള് ഉപയോഗിക്കുന്ന ബൈക്ക് തിരുവനന്തപുരത്തുനിന്നും മോഷ്ടിച്ച് കൊണ്ടുവന്നതാണെന്ന് സമ്മതിച്ചത്. തിരുവനന്തപുരം മെഡിക്കല് കോളജ് പൊലീസ് സ്റ്റേഷനില് ഇത് സംബന്ധിച്ച കേസില് അന്വേഷണം നടന്നുവരികയായിരുന്നു.
ജയേഷ്, മനോജ് എന്നിവര് മുന്പ് റബര് ഷീറ്റ് മോഷണ കേസില് ജയിലില് കഴിഞ്ഞപ്പോഴാണ് വിജയകുമാറുമായി പരിചയത്തിലാകുന്നത്. തുടര്ന്ന് ഇവര് കൊക്കോ മോഷണം ആസൂത്രണം ചെയ്യുകയും രണ്ട് ദിവസങ്ങള്ക്ക് മുന്പ് പാലൂര്ക്കാവിലെ വീട്ടില് നിന്നും മോഷണം നടത്തുകയുമായിരുന്നു. പെരുവന്താനം എസ്ഐ ജി.വിഷ്ണു, അഡീഷണല് എസ്ഐ ഔസേഫ് ചാക്കോ, സീനിയര് സിവില് പൊലീസ് ഓഫീസര് അഷറഫ്, സിവില് പൊലീസ് ഒഫീസര്മാരായ ബിജു, ബിബിന് ലാല്, സബീര് എന്നിവര് ചേര്ന്നാണ് പ്രതികളെ പിടികൂടിയത്.
