അരൂര്: സ്വകാര്യ ബസുകളുടെ മത്സരയോട്ടം മനുഷ്യജീവന് ഭീഷണിയായി മാറുന്നതായി പരാതി. ചെറു വാഹനങ്ങള് ഉള്പ്പടെ വലിയ വാഹനങ്ങള്ക്കും കാല്നട യാത്രികര്ക്കുമാണ് കൂടുതല് അപകടങ്ങള് നേരിടേണ്ടി വരുന്നത്. സമയക്രമം പാലിക്കാതെ മല്സരയോട്ടം നടത്തുന്നതാണ് അപകടങ്ങള്ക്ക് കാരണം.
സര്വീസ് തുടങ്ങേണ്ട സ്ഥലത്തു നിന്നും കൃത്യ സമയത്ത് ബസ് എടുക്കാറുണ്ട്. എന്നാല് വളരെ സാവധാനത്തില് ആരംഭിക്കുന്ന ഓട്ടം പിന്നീട് അമിതവേഗതയിലാക്കുകയാണ് ചെയ്യുന്നത്. പിന്നാലെ അടുത്ത ബസ് എത്തുന്നതുവരെ വളരെ സാവധാനത്തില് ഓടുന്ന ബസ് പിന്നില് മറ്റൊരു ബസ് കണ്ടാല് പിന്നെ മല്സരഓട്ടമാണ്.
ഇക്കാരണത്താല് പലപ്പോഴും ബസ് ജീവനക്കാര് തമ്മില് വാക്കു തര്ക്കവും സംഘട്ടനങ്ങളും നിത്യ സംഭവമാണ്. നിര്ദ്ദിഷ്ട സ്റ്റോപ്പുകളില് നിര്ത്താതെ വരുന്നതും അമിത വേഗതയിലോടുന്നതും യാത്രക്കാര്ക്ക് ബുദ്ധിമുട്ടിക്കുന്നു. നിര്ദ്ദിഷ്ട സ്റ്റോപ്പുകളില് ബസുകള് നിര്ത്തണമെന്ന നിബന്ധനയും കാറ്റില് പറത്തുകയാണ്. സ്റ്റോപ്പ് ഇല്ലാത്തയിടങ്ങളില് ബസുകള് നിര്ത്തുന്ന രീതിയും സ്വകാര്യ ബസുകള് അവലംമ്പിക്കുന്നുണ്ട്. ഇത് പ്രധാനമായും ബാധിക്കുന്നത് സ്ക്കൂള് വിദ്യാര്ത്ഥികളെയാണ്.
ഇക്കാരണത്താല് വിദ്യാര്ത്ഥികള്ക്ക് യഥാസമയം പലപ്പോഴും ക്ളാസുകളിലും വീടുകളിലും എത്തിചേരുവാന് കഴിയാത്ത അവസ്ഥയാണ്. യാത്രക്കാര്ക്ക് യാതൊരുവിധ സുരക്ഷിതത്വവും നല്കുവാന് സ്വകാര്യ ബസുകള് തയ്യാറാകുന്നില്ല. ഗതാഗത കുരുക്കു മൂലം സമയനിഷ്ഠ പാലിക്കുവാന് കഴിയുന്നില്ലെന്നാണ് ബസ് ജീവനക്കാര് പറയുന്നത്.
ചേര്ത്തല മുതല് എറണാകുളം ഭാഗത്തേക്ക് സര്വീസ് നടത്തുന്ന ബസുകളാണ് ഇത്തരത്തില് അപകടകരമാകും വിധം സര്വീസ് നടത്തുന്നത്. ഇതും പലപ്പോഴും വന് അപകടങ്ങള്ക്ക് കാരണമാകുന്നു.
