എ.കേരളവര്‍മ്മ
കോട്ടയം: കുറച്ച്കാലം കൊണ്ട് നിരവധി കാര്യങ്ങള്‍ ചെയ്തുതീര്‍ത്ത അസാധാരണമായ സംഘടനാ പാടവത്തിന്റെ ആള്‍രൂപമായിരുന്നു കഴിഞ്ഞ ചൊവ്വാഴ്ച നമ്മെ വിട്ടുപിരിഞ്ഞ കെ.എന്‍.നടരാജന്‍ ചേട്ടന്‍. ബിഎസ്എന്‍എലില്‍ ദീര്‍ഘനാളത്തെ ഔദ്യോഗിക ജീവിതവും ഇടതുപക്ഷ സംഘടനാ പ്രവര്‍ത്തനവും നടത്തിയ അദ്ദേഹം വിപ്ലവ പ്രസ്ഥാനങ്ങളുടെ കാപട്യം സ്‌നന്തം അനുഭവത്തിലൂടെ തിരിച്ചറിഞ്ഞ് പൂര്‍ണ്ണസ്വയം സേവകനായി സംഘപഥത്തിലേക്ക് കടന്നുവരികയായിരുന്നു.
കഴിഞ്ഞ ചൊവ്വാഴ്ച കാര്യാലയത്തിലെത്തി ശാഖയില്‍ പങ്കെടുത്ത് സംഘകാര്യങ്ങള്‍ ചര്‍ച്ച ചെയ്തശേഷം വീട്ടിലെത്തി മിനിട്ടുകള്‍ക്കുള്ളില്‍ അന്ത്യം സംഭവിക്കുകയുമായിരുന്നു. തന്നെ ബാധിച്ചിരുന്ന ഗുരുതരമായ ഹൃദ്രോഗത്തെ വകവയ്‌ക്കാതെ അന്ത്യനിമിഷം വരെ കര്‍മ്മ നിരതനാകുവാന്‍ ആ കാര്യകര്‍ത്താവിന് കഴിഞ്ഞു.
ബിഎസ്എന്‍എല്‍ സബ്ഡിവിഷണല്‍ എന്‍ജിനീയര്‍ എന്ന ഉന്നത ഔദ്യോഗിക പദവിയില്‍ ഇരുന്നിട്ടും നഗരത്തില്‍ നല്ലനിലയില്‍ കഴിയാനുള്ള ജീവിതസാഹചര്യം ഉണ്ടായിട്ടും ക്ലേശകരമായ സംഘടനാ പ്രവര്‍ത്തനത്തില്‍ മുഴുകുവാന്‍ നടരാജന്‍ ചേട്ടന്‍ കാട്ടിയ ദേശസ്‌നേഹവും സന്മനോഭാവവും യുവതലമുറയ്‌ക്ക് മാതൃകയാകേണ്ടതാണ്. 2004ല്‍ ഔദ്യോഗിക ജീവിതത്തില്‍ നിന്ന് വിരമിച്ചശേഷം ഒരുവ്യാഴവട്ടക്കാലം നടരാജന്‍ ചേട്ടന്‍ നടത്തിയ സംഘടനാ പ്രവര്‍ത്തനങ്ങള്‍ കോട്ടയം നഗരത്തില്‍ ദേശീയ പ്രസ്ഥാനങ്ങള്‍ക്ക് ശക്തമായ അടിത്തറ സൃഷ്ടിച്ചു.
കോട്ടയം നഗരത്തില്‍ തപസ്യ, ബാലഗോകുലം തുടങ്ങിയ സംഘടനകളുടെ പ്രവര്‍ത്തനം വ്യാപിപ്പിക്കുവാന്‍ അദ്ദേഹം മുന്‍കൈ എടുത്തു. സംഘകാര്യത്തിലെ ഓഫീസ് നിര്‍വ്വഹണം അതീവ ജാഗ്രതയോടെ അദ്ദേഹം ശ്രദ്ധിച്ചു പോന്നിരുന്നു. വ്യവസ്ഥാ പ്രമുഖ് എന്ന നിലയില്‍ ദൈനംദിന സംഘടനാ കാര്യങ്ങളില്‍ അദ്ദേഹം കാട്ടിയ ആത്മാര്‍ത്ഥത മാതൃകാപരമാണ്.
2012ല്‍ കോട്ടയത്ത് നടനന്ന തപസ്യയുടെ സംസ്ഥാന സമ്മേളനത്തിന്റെ സംഘടനത്തിന് മുന്നിട്ടിറങ്ങിയതും നടരാജന്‍ ചേട്ടന്‍തന്നെ. താന്‍ വിശ്വസിച്ചിരുന്ന ആദര്‍ശങ്ങള്‍ക്കുവേണ്ടി അവസാനശ്വാസംവരെ പോരാടാന്‍ മടിയില്ലാതെ കര്‍മ്മനിരതനായി തുടര്‍ന്ന ആ വ്യക്തിത്വത്തിന്റെ വിയോഗം തീരാനഷ്ടമാണ്. എന്നും പ്രഭാതത്തില്‍ ശുഭ്രവസ്ത്രധാരിയായി ഭസ്മക്കുറിതൊട്ട് നിറഞ്ഞ പുഞ്ചിരിയുമായി യൂണിയന്‍ ക്ലബിന്റെ കയറ്റം കയറിവരുന്ന ആ സുസ്‌മേരവദനം ഇനി ഓര്‍മ്മ മാത്രമായി മാറുന്നു എന്ന സത്യം വേദനാജനകമാണ്. അദ്ദേഹത്തിന്റെ കുടുംബാംഗങ്ങളുടെ ദുഖത്തില്‍ നമുക്കും പങ്കുചേരാം.
