കണ്ണൂര്: മദ്യത്തിനും മയക്കുമരുന്നിനുമെതിരായ ബോധവല്ക്കരണം ലക്ഷ്യമിട്ട് സംസ്ഥാന സര്ക്കാര് നടപ്പാക്കുന്ന വിമുക്തി ലഹരിവര്ജന മിഷന്റെ ജില്ലാതല ഉദ്ഘാടനത്തോടനുബന്ധിച്ച് വിളംബര ഘോഷയാത്രയും ബൈക്ക്റാലിയും ഫഌഷ്മോബും സംഘടിപ്പിച്ചു. കലക്ടറേറ്റ് പരിസരത്ത് നിന്നാരംഭിച്ച വിളംബരഘോഷയാത്ര പഴയ ബസ്സ്റ്റാന്റ് പരിസരത്ത് സമാപിച്ചു. മുത്തുക്കുടകളുടെയും ബാന്റ് വാദ്യത്തിന്റെയും കളരിപ്പയറ്റിന്റെയും അകമ്പടിയോടെ നടന്ന വിളംബരഘോഷയാത്ര ജില്ലാ കലക്ടര് മീര് മുഹമ്മദലി ഉദ്ഘാടനം ചെയ്തു. ഡെപ്യൂട്ടി എക്സൈസ് കമ്മീഷണര് വി.വി.സുരേന്ദ്രന്, അസിസ്റ്റന്റ് എക്സൈസ് കമ്മീഷണര് ചന്ദ്രപാല് തുടങ്ങിയവര് നേതൃത്വം നല്കി. ജനപ്രതിനിധികള്, ഉദ്യോഗസ്ഥര്, കുടുംബശ്രീ വിദ്യാര്ഥികള്, സന്നദ്ധ പ്രവര്ത്തകര് തുടങ്ങിയവര് പങ്കെടുത്തു. ലഹരി വിരുദ്ധ സന്ദേശമടങ്ങിയ പ്ലക്കാര്ഡുകളുമായി എക്സൈസ് വകുപ്പ് ജീവനക്കാര് സംഘടിപ്പിച്ച ബൈക്ക് റാലിയും ശ്രദ്ധേയമായി. വിമുക്തി മിഷന് പ്രചാരണത്തിന്റെ ഭാഗമായി ഇന്ന് സംഘടിപ്പിക്കുന്ന കൂട്ടയോട്ടം വൈകീട്ട് അഞ്ചിന് കലക്ടറേറ്റ് പരിസരത്ത് നിന്ന് ആരംഭിക്കും.
നാളെ വൈകീട്ട് അഞ്ചിന് മന്ത്രി കെ.കെ.ശൈലജ വിമുക്തി മിഷന്റെ ജില്ലാ തല ഉദ്ഘാടനം നിര്വഹിക്കും. കണ്ണൂര് ടൗണ് സ്ക്വയറില് നടക്കുന്ന ചടങ്ങില് മന്ത്രിമാര്, എംപിമാര്, എംഎല്എമാര്, മറ്റു ജനപ്രതിനിധികള്, വിശിഷ്ട വ്യക്തികള് തുടങ്ങിയവര് സംബന്ധിക്കും.
