കണ്ണൂര്: വിദ്യാര്ഥികളില് തൊഴില് നൈപുണ്യത്തോടൊപ്പം ഏറ്റവും അനിവാര്യമായ ആശയവിനിമയ ശേഷി കൂടി വളര്ത്തിയെടുക്കുന്ന അഡീഷനല് സ്കില് അക്വിസിഷന് പ്രോഗ്രാമിന്റെ പ്രവര്ത്തനങ്ങള് മാതൃകാപരമാണെന്ന് ജില്ലാ കലക്ടര് മീര് മുഹമ്മദലി അഭിപ്രായപ്പെട്ടു. കലക്ടറേറ്റ് കോണ്ഫറന്സ് ഹാളില് അസാപ്പ് ജില്ലാ കമ്മിറ്റി യോഗത്തില് സംസാരിക്കുകയായിരുന്നു അദ്ദേഹം.
തൊഴില് നൈപുണ്യത്തോടൊപ്പം പ്രധാനമാണ് വിദ്യാര്ഥികളിലെ ആശയവിനിമയ ശേഷി പോഷിപ്പിക്കുകയെന്നത്. സംസാരിക്കുന്നതിലും ഭാഷ ഉപയോഗിക്കുന്നതിലുമുള്ള കഴിവ് മാത്രമല്ല ഇതുകൊണ്ട് അര്ഥമാക്കുന്നത്. മറിച്ച് മറ്റുള്ളവരോട് മാന്യമായി പെരുമാറുകയും അവരെ തുല്യരായി കാണുകയും ചെയ്യാനുള്ള കഴിവാണ്. വിദ്യാലയങ്ങളിലെ പാഠ്യവിഷയങ്ങളില് നിന്നല്ല ജീവിതാനുഭവങ്ങളില് നിന്നാണ് നല്ല ആശയവിനിമയ ശേഷി ഒരാള്ക്ക് ആര്ജിക്കാനാവൂ എന്നും അദ്ദേഹം പറഞ്ഞു.
മാറുന്ന കാലത്തിനനുസരിച്ച് പുതിയ തൊഴില്പരിശീലന മേഖലകളിലേക്ക് പ്രവേശിക്കാനാണ് അടുത്തഘട്ടത്തില് ലക്ഷ്യമിടുന്നതെന്ന് ചടങ്ങില് സംസാരിച്ച അസാപ്പ് റീജ്യണല് പ്രോഗ്രാം മാനേജര് സ്മിത സുകുമാരന് പറഞ്ഞു. ജില്ലയിലെ അസാപ്പിന്റെ പ്രവര്ത്തനങ്ങളെക്കുറിച്ച് സീനിയര് പ്രോഗ്രാം മാനേജര് ഇന്ചാര്ജ് ഡയാന തങ്കച്ചന് വിശദീകരിച്ചു. ജില്ലയിലെ ഭാവി പ്രവര്ത്തനങ്ങളെക്കുറിച്ചുള്ള ചര്ച്ചയും യോഗത്തില് നടന്നു. ഫീസിളവിന് അര്ഹരായ വിദ്യാര്ഥികളുടെ പട്ടിക യോഗം അംഗീകരിച്ചു. തലശ്ശേരി പ്രോഗ്രാം മാനേജര് കെ.കെ.മനു കെ.കെ, എച്ച്എസ്എസ് ജില്ലാ കോ-ഓഡിനേറ്റര് മുരളീധരന്, കതിരൂര് പ്രോഗ്രാം മാനേജര് സിതാര സദാനന്ദന് തുടങ്ങിയവര് സംസാരിച്ചു.
