ചേര്ത്തല: കോളേജ് വിദ്യാര്ത്ഥികള് ഒത്തൊരുമിച്ചു, രണ്ടു നിര്ദ്ധന യുവതികള് സുമംഗലികളായി. ചേര്ത്തല എസ്എം കോളേജിലെ നാഷണല് സര്വീസ് സ്ക്കിമിന്റെ നേതൃത്വത്തില് ‘മംഗല്യനിധി’ പദ്ധതിപ്രകാരമാണ് വിവാഹം നടത്തിയത്. എന്എസ്എസ് വോളന്റിയര്മാര് കോളേജില് നടത്തിയ ബിരിയാണി മേള, സമ്മാന കൂപ്പണ്, കൂടാതെ സുമനസുകളില്നിന്നും മംഗല്യനിധി സംഭാവന കൂപ്പണ് വഴിയും സമാഹരിച്ച തുക ഉപയോഗിച്ചാണ് രണ്ടു യുവതികള്ക്ക് മംഗല്യഭാഗ്യം ഒരുക്കിയത്.
ആലപ്പുഴ വഴിച്ചേരി വിജയന്റെ മകള് ജോമോള്, കാട്ടൂര് ചെറിയപൊഴി പരേതനായ ജോണ് കുട്ടിയുടെ മകള് ജ്യോതി എന്നിവരുടെ വിവാഹമാണ് വിദ്യാര്ത്ഥികള് നടത്തിയത്. ആലപ്പുഴ കത്തീഡ്രലിലും ഓമനപ്പുഴ സെന്റ് സേവിയേഴ്സ് പള്ളിയിലുമാണ് വിവാഹങ്ങള് നടത്തിയത്. വധുവിന് അണിയുന്നതിന് പത്തുപവന് സ്വര്ണാഭരണങ്ങളും, വിവാഹ സല്ക്കാര ചിലവുകളും ഉള്പ്പടെ വലിയൊരു സാമ്പത്തിക ഭാരവും വിദ്യാര്ത്ഥികള് ഏറ്റെടുക്കുകയായിരുന്നു. വോളന്റിയര് സെക്രട്ടറിമാരായ നിതിന് തോമസ്, അരുണ്കുമാര്, സുദേവ്, ശ്രുതിലക്ഷ്മി, അനീഷ് കുമാര് എന്നിവരുടെ മാസങ്ങള് നീണ്ട പരിശ്രമത്തിന്റെ ഫലം കൂടിയാണിത്.
