ആലപ്പുഴ: മാര്ച്ച് എട്ടിനു തുടങ്ങുന്ന എസ്എസ്എല്സി പരീക്ഷയ്ക്കുള്ള ഒരുക്കം അന്തിമഘട്ടത്തില്. ജില്ലയില് 25,111 വിദ്യാര്ത്ഥികളാണ് രജിസ്റ്റര് ചെയ്തിട്ടുള്ളത്. ഇതില് 12,530 ആണ്കുട്ടികളും 12,581 പെണ്കുട്ടികളുമാണുള്ളത്. 2,929 പട്ടികജാതി വിദ്യാര്ത്ഥികളും 65 പട്ടികവര്ഗ്ഗ വിദ്യാര്ത്ഥികളുമുണ്ട്. 37 പേര് സ്വകാര്യവിദ്യാര്ത്ഥികളാണ്. 2,00 പരീക്ഷ കേന്ദ്രങ്ങളിലായി 2,294 അദ്ധ്യാപകരാണ് പരീക്ഷ ചുമതല വഹിക്കുന്നത്. അതത് വിദ്യാഭ്യാസ ജില്ലകളില് എത്തിച്ച ചോദ്യപേപ്പര് മാര്ച്ച് രണ്ട്, മൂന്ന് തീയതികളില് തരം തിരിച്ചശേഷം വിവിധ ട്രഷറികള്, ബാങ്കുകള് എന്നിവിടങ്ങളിലെ സ്ട്രോങ് മുറികളിലേക്ക് മാറ്റും.
ജില്ലയില് ഏറ്റവും കൂടുതല് വിദ്യാര്ത്ഥികള് പരീക്ഷയെഴുതുന്നത് മാവേലിക്കര വിദ്യാഭ്യാസ ജില്ലയിലാണ്. 3,885 ആണ്കുട്ടികളും 4,205 പെണ്കുട്ടികളും ഉള്പ്പടെ 8,090 വിദ്യാര്ത്ഥികളാണ് ഇവിടെ പരീക്ഷയെഴുതുന്നത്.
ഏറ്റവും കുറവ് വിദ്യാര്ത്ഥികള് പരീക്ഷയെഴുതുന്നത് കുട്ടനാട് വിദ്യാഭ്യാസ ജില്ലയിലാണ്. 1,247 ആണ്കുട്ടികളും 1,097 പെണ്കുട്ടികളും ഉള്പ്പടെ 2,344 വിദ്യാര്ഥികളാണ് 34 കേന്ദ്രങ്ങളിലായി പരീക്ഷയെഴുതുക.
ചേര്ത്തല വിദ്യാഭ്യാസ ജില്ലയില് 7,501 വിദ്യാര്ത്ഥികളില് 3,906 ആണ്കുട്ടികളും 3,595 പെണ്കുട്ടികളുമാണ്. ആലപ്പുഴയില് 46 കേന്ദ്രങ്ങളിലായി 7,176 വിദ്യാര്ത്ഥികളാണുള്ളത്. ഇതില് 3,492 ആണ്കുട്ടികളും 3,684 പെണ്കുട്ടികളുമുണ്ട്.
മാര്ച്ച് എട്ടു മുതല് ജില്ലാ വിദ്യാഭ്യാസ ഓഫീസര്, ഉപജില്ല വിദ്യാഭ്യാസ ഓഫീസര് എന്നിവരുടെ നേതൃത്വത്തിലുള്ള പരിശോധന സംഘങ്ങള് സ്കൂളുകള് സന്ദര്ശിക്കും. ആവശ്യമുള്ള കേന്ദ്രങ്ങളില് പോലീസ് സഹായവും ഉറപ്പാക്കും.
