കോട്ടയം: ദേശീയ-സംസ്ഥാന പാതകളുടെ 500മീറ്റര് ദൂരപരിധിയില് വരുന്ന മദ്യശാലകള് അടച്ച് പൂട്ടണമെന്ന സുപ്രീംകോടതി ഉത്തരവില്നിന്നും കള്ളുഷാപ്പുകളെ ഒഴിവാക്കിയിട്ടുണ്ട് എന്ന് ഉറപ്പ് വരുത്തുവാന് കേരള സര്ക്കാര് അടിയന്തിര നടപടി സ്വീകരിക്കണമെന്നും കള്ള് ചെത്ത് വ്യവസായം നേരിടുന്ന പ്രതിസന്ധികള് പരിഹരിച്ച് തൊഴിലാളി ക്ഷേമബോര്ഡിനെ കാര്യക്ഷമമാക്കി കുറഞ്ഞ പെന്ഷന് 3000 രൂപയായി വര്ദ്ധിപ്പിക്കണമെന്നും ബിഎംഎസ് ജില്ലാ പ്രസിഡന്റ് വി.എസ്.പ്രസാദ് സര്ക്കാരിനോട് ആവശ്യപ്പെട്ടു. കോട്ടയം ജില്ലാ ടോഡി ആന്റ് അബ്കാരി മസ്ദൂര്സംഘ് ജില്ലാ വാര്ഷിക സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ചാരായ-ബാര് നിരോധനത്തിലൂടെ തൊഴില് നഷ്ടപ്പെട്ടവര്ക്ക് അര്ഹമായ നഷ്ടപരിഹാരമോ പുനരധിവാസമോ നല്കണമെന്നും അദ്ദേഹം ആവശ്യപ്പെട്ടു. യോഗത്തില് ജില്ലാ വൈസ് പ്രസിഡന്റ് കെ.എം.ഗോപി അദ്ധ്യക്ഷത വഹിച്ചു. കെ.എന്.മോഹനന് പ്രവര്ത്തന റിപ്പോര്ട്ടും സാമ്പത്തിക റിപ്പോര്ട്ടും അവതരിപ്പിച്ചത് സമ്മേളനം ഐക്യകണ്ഠേന അംഗീകരിച്ചു.
പരമ്പരാഗത കള്ള് ചെത്ത് വ്യവസായത്തെ സംരക്ഷിക്കുക, ടോഡി ബോര്ഡ് രൂപീകരിക്കുക, ചാരായ-ബാര് നിരോധനത്തിലൂടെ തൊഴില് നഷ്ടപ്പെട്ടവരെ പുനരധിവസിപ്പിക്കുക, തുടങ്ങിയ ഔദ്യോഗിക പ്രമേയങ്ങള് സമ്മേളനം അംഗീകരിച്ചു. ടി.വി.ബാലകൃഷ്ണന് സ്വാഗതവും ബിജു.പി.മാണി നന്ദിയും പറഞ്ഞു. പുതിയ ഭാരവാഹികളായി വി.എസ്.പ്രസാദ്, പ്രസിഡന്റ് ടി.പി.ബാലകൃഷ്ണ്, ബെന്നി ജേക്കബ്, കെ.ജി.രാജേഷ്, വൈസ് പ്രസിഡന്റുമാര് കെ.എന്.മോഹനന്, ജനറല് സെക്രട്ടറി എന്.ജയന്, പി.കെ.മനോജ്, ബിജു.പി.മാണി, സെക്രട്ടറിമാര്, എന്.സന്തോഷ് കുമാര് ട്രഷറാര് എന്നിവരടങ്ങുന്ന 21അംഗ സമിതിയെയും തെരഞ്ഞെടുത്തു.
