തിരുവനന്തപുരം: അക്കാദമിക് – ഭൗതിക സാഹചര്യങ്ങള് മെച്ചപ്പെടുത്തി അട്ടക്കുളങ്ങര സെന്ട്രല് സ്കൂളിനെ സംസ്ഥാനത്തെ മികച്ച വിദ്യാലയമാക്കി മാറ്റുമെന്ന് വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് പറഞ്ഞു. കുട്ടികള്ക്ക് പഠിക്കാനുള്ള എല്ലാ സാഹചര്യവും ഇവിടെയുണ്ടാവും. പാരിസ്ഥിതിക സൗന്ദര്യം നിലനിര്ത്തി സ്കൂളിലെ പൗരാണിക മൂല്യമുള്ള കെട്ടിടങ്ങള് പുതുക്കിപ്പണിയുന്നതിന്റെ ഉദ്ഘാടനം നിര്വഹിക്കുകയായിരുന്നു മന്ത്രി.
ഉന്നതവിദ്യാഭ്യാസ രംഗത്തും കാലാനുസൃതമായ മാറ്റം വരും. 52 സര്ക്കാര് കോളേജുകളില് അക്കാദമിക് നിലവാരം ഉയര്ത്തുന്നതിനും ഹൈടെക് സൗകര്യങ്ങള് ഒരുക്കുന്നതിനും എട്ടരക്കോടി രൂപ വീതവും എട്ടു കോളേജുകളില് കെട്ടിടം നിര്മിക്കുന്നതിന് 12 കോടി രൂപ വീതവും അനുവദിക്കും. ഇതിനായി കിഫ്ബിയില് പദ്ധതി സമര്പ്പിക്കും. 55,000 ക്ലാസുകള് ഹൈടെക്ക ആക്കുന്നതിന് 600 കോടി രൂപയുടെ പദ്ധതി ഈ വര്ഷം നടപ്പാക്കും. അധ്യാപക പരിശീലനത്തിനു പുതിയ പദ്ധതി ആവിഷ്ക്കരിക്കും. സര്ക്കാര് സ്കൂളുകളുടെ നിലവാരം അടിമുടി മാറുന്നതോടൊപ്പം വിദ്യാര്ത്ഥികളുടെ പഠനകാര്യങ്ങളില് ഇടപെടുന്നതില് അധ്യാപകരും വിദ്യാര്ത്ഥികളും അവസരത്തിനൊത്ത് ഉയരണമെന്നും മന്ത്രി പറഞ്ഞു.
വി.എസ്. ശിവകുമാര് എംഎല്എ അധ്യക്ഷത വഹിച്ചു. സ്കൂള് സംരക്ഷണ സമിതി സെക്രട്ടറി ജി. സജികുമാര്, പൊതുവിദ്യാഭ്യാസ സെക്രട്ടറി കെ.വി. മോഹന്കുമാര്, ആര്ക്കിടെക്ട് ജി.ശങ്കര്, സ്കൂള് സംരക്ഷണസമിതി പ്രസിഡന്റ് ഇ.എം. രാധ, പിടിഎ പ്രസിഡന്റ് ഷാജഹാന്, ഹെഡ്മിസ്ട്രസ് യമുനാദേവി എന്നിവര് സംബന്ധിച്ചു.
ഒരുമരം പോലും മുറിക്കാതെയും സ്കൂള് കെട്ടിടങ്ങള് അതേപടി നിലനിര്ത്തിയുമാണ് നവീകരണം നടത്തുക. ബയോ ഡൈവേഴ്സിറ്റി പാര്ക്ക്, കൂത്തമ്പലം, ഫുട്ബാള് ഗ്രൗണ്ട്, കലാകായിക പാര്ക്ക് എന്നീ സംവിധാനങ്ങള് സ്കൂള് പുനരുദ്ധരണത്തിത്തിന്റെ ഭാഗമായിനടപ്പാക്കും. അടുത്ത അധ്യയന വര്ഷാരംഭത്തിനകം സ്കൂള് പുതുക്കിപ്പണിയുന്ന പ്രവൃത്തികള് പൂര്ത്തിയാക്കും.
സ്കൂള് സംരക്ഷണസമിതിയും പിടിഎയും സംയുക്തമായി നടത്തിയ ശ്രമഫലമായാണ് ട്രിഡ ഏറ്റെടുക്കാനിരുന്ന സ്കൂളിന്റെ സ്ഥലം തിരികെ ലഭിച്ചത്. ഗവണ്മെന്റ് കോളേജ് റിട്ട. ടീച്ചേഴ്സ് വെല്ഫെയര് അസോസിയേഷന് പ്രവര്ത്തകര് ഈ സ്കൂളിന്റെ നവീകരണവുമായി സഹകരിച്ചു പ്രവര്ത്തിക്കാന് തീരുമാനിച്ചു. ഇതിന്റെ ഭാഗമായി സ്കൂള് സമയം കഴിഞ്ഞ്് സയന്സ്, ഇംഗഌീഷ്, കണക്ക് വിഷയങ്ങളില് സൗജന്യമായി ക്ലാസെടുക്കും. ടെക്നോപാര്ക്കിലുള്ള പോളസ് സോഫ്റ്റ്വെയര് കമ്പനിയുമായി സഹകരിച്ച് മൂന്നു കംപ്യൂട്ടര് നല്കുമെന്നും അസോസിയേഷന് ഭാരവാഹികള് പറഞ്ഞു.
