തിരുവനന്തപുരം: ബജറ്റിന് മുന്നോടിയായി ധനകാര്യ മന്ത്രി വിളിച്ചുചേര്ത്ത പ്രീ ബജറ്റ് യോഗം ഭരണകക്ഷിയില്പെട്ട യൂണിയനുകള് ബഹിഷ്ക്കരിച്ചു. ബുധനാഴ്ച ഉച്ചയ്ക്ക് രണ്ടിന് ധനമന്ത്രി തോമസ് ഐസക് തൈക്കാട് ഗസ്റ്റ് ഹൗസില് വിളിച്ചുകൂട്ടിയ തൊഴിലാളി യൂണിയന് പ്രതിനിധികളുടെ യോഗത്തില് നിന്നാണ് ഇടത് യൂണിയനുകള് വിട്ടുനിന്നത്.
തൊഴിലാളികളുടെ ക്ഷേമനിധി, മിനിമം വേതനം, മറ്റ് ആനുകൂല്യങ്ങള് എന്നിവയെ സംബന്ധിച്ച് യൂണിയനുകളുടെ അഭിപ്രായം ആരായാനാണ് പ്രീ ബജറ്റ് യോഗം ചേരുന്നത്. തൊഴിലാളികളുടെ അഭിപ്രായങ്ങള് മന്ത്രിയെ അറിയിക്കാനുള്ള വേദികൂടിയാണിത്. യൂണിയന് പ്രതിനിധികള് ഉന്നയിക്കുന്ന നിര്ദ്ദേശങ്ങള് പരിഗണിച്ചാണ് അന്തിമ ബജറ്റ് തയ്യാറാക്കുന്നത്.
നിരവധി മേഖലകളില് തൊഴിലെടുക്കുന്ന തൊഴിലാളികള് അംഗത്വമെടുത്തിട്ടുള്ള യൂണിയനുകളാണ് സിഐറ്റിയു, എഐറ്റിയുസി എന്നിവ. സംസ്ഥാനത്തെ പ്രബല യൂണിയനുകളെന്നാണ് ഇക്കൂട്ടരുടെ അവകാശവാദവും. ഇവര് യോഗത്തില് പങ്കെടുക്കാത്തത് ഐഎന്റ്റിയുസി നേതാവ് ചന്ദ്രശേഖരന് മന്ത്രിയുടെ ശ്രദ്ധയില്പെടുത്തി. മന്ത്രി ഉദ്ധ്യോഗസ്ഥരോട് കാര്യം തിരക്കി. യോഗത്തില് ഉന്നയിക്കേണ്ട വിഷയങ്ങള് ചര്ച്ചചെയ്ത് തീരുമാനമെടുക്കാന് സാധിക്കാത്തതിനാല് ഭരണകക്ഷി യൂണിയനുകള് പങ്കെടുക്കില്ലെന്ന് അറിയിച്ചിരുന്നതായി ഉദ്ധ്യോഗസ്ഥര് മന്ത്രിയെ അറിയിച്ച് തല്ക്കാലം തടിതപ്പി. തൊഴിലാളി വര്ഗ്ഗത്തിന്റെ നാവാണെന്ന് അവകാശപ്പെടുന്നവര് തൊഴിലാളികളുടെ ക്ഷേമത്തിനു വേണ്ടി നാവനക്കാറില്ല. ഇതിന്റെ ഏറ്റവും വലിയ ഉദാഹരണമാണ് പ്രീ ബജറ്റ് ചര്ച്ച ബഹിഷ്ക്കരിച്ചതെന്ന് ആക്ഷേപമുണ്ട്.
