തിരുവനന്തപുരം: ‘ഞങ്ങള്ക്ക് അവിടെ പോകാന് തന്നെ പേടിയാണ് മാഡം….’ യൂണിവേഴ്സിറ്റി കോളേജില് എസ്എഫ്ഐയുടെ സദാചാര പോലീസ് ഗുണ്ടായിസത്തിന് ഇരയായ പെണ്കുട്ടികള് ദേശീയ വനിതാ കമ്മീഷന് മുന്നില് പറഞ്ഞ വാക്കുകളാണിത്. യൂണിവേഴ്സിറ്റി കേളേജിലെ എസ്എഫ്ഐ പ്രവര്ത്തക കൂടിയായ സൂര്യ ഗായത്രിയും അസ്ബിദയുമാണ് ഇന്നലെ തൈക്കാട് ഗസ്റ്റ് ഹൗസിലെത്തി ദേശീയ വനിതാ കമ്മീഷന് അംഗം സുഷമാ സാഹുവിന് പരാതി നല്കിയത്.
അക്രമം നടക്കുമ്പോള് പ്രിന്സിപ്പാളും വൈസ് പ്രിന്സിപ്പാളും നോക്കിനില്ക്കുകയായിരുന്നു. ശാരീകആക്രമണത്തെക്കാള് വലുതാണ് സോഷ്യല് മീഡിയകളിലൂടെയും ചാനലുകളിലൂടെയും എസ്എഫ്ഐ അഴിച്ചുവിടുന്ന ആരോപണങ്ങളെന്ന് വിദ്യാര്ത്ഥിനികള് പറഞ്ഞു. കോളേജിനുള്ളില് ഇത്തരം സംഭവങ്ങള് സ്ഥിരമാണ്. എതിര്ക്കുന്നവരെ ആക്രമിച്ചും മാനസികമായി തളര്ത്തിയും നിശബ്ദരാക്കുകയാണ്. വെള്ളിയാഴ്ച പ്രിന്സിപ്പാളിന് പരാതി നല്കിയപ്പോള് തിങ്കളാഴ്ച പരിഗണിക്കാമെന്നാണ് അസ്മിതയോടും ഉമ്മയോടും പറഞ്ഞത്. എന്നാല് ഇപ്പോള് അങ്ങനെയൊരു പരാതിയേ ഇല്ലെന്ന മട്ടിലാണ് പ്രിന്സിപ്പാള് പെരുമാറുന്നത്. നിരവധി വിദ്യാര്ത്ഥികളാണ് എസ്എഫ്ഐ പ്രവര്ത്തകരുടെ ആക്രമണത്തെതുടര്ന്ന് പഠനം ഉപേക്ഷിച്ച് പോയതെന്നും വിദ്യാര്ത്ഥികള് കമ്മീഷനോട് പറഞ്ഞു.
യൂണിവേഴ്സിറ്റി കോളേജില് ഗുണ്ടാരാജ് നിലനില്ക്കുന്നതായി പെണ്കുട്ടികളുടെ മൊഴിയില് നിന്നു മനസ്സിലായതായി കമ്മീഷന് പറഞ്ഞു. പെണ്കുട്ടികളുടെ പരാതിയില് കേസെടുക്കേണ്ട പോലീസ് അവര്ക്കെതിരെ നീങ്ങുന്നത് മനുഷ്യത്വരഹിതമാണ്. പെണ്കുട്ടികളുടെ പരാതിയുടെ അടിസ്ഥാനത്തില് കുറ്റക്കാര്ക്കെതിരെ ദേശീയ വനിതാ കമ്മീഷന് കേസെടുക്കുമെന്നും സുഷമാ സാഹു അറിയിച്ചു. തങ്ങള്ക്ക് പഠിക്കാന് കോളേജിനുള്ളില് പ്രവേശിക്കുന്നതിന് സുരക്ഷാ പ്രശ്നമുണ്ടെന്നുകാട്ടി പെണ്കുട്ടികള് ഗവര്ണര്ക്ക് ഇമെയില് വഴി പരാതി നല്കിയിട്ടുണ്ട്.
