കുമ്പളം: വൈദ്യുതി ബില് അടയ്ക്കേണ്ട സമയപരിധി കഴിഞ്ഞതിന് വീട്ടമ്മയ്ക്ക് കുമ്പളം കെഎസ്ഇബി വക എട്ടിന്റെ പണി. ഒരു ബില് തുക ഒരു ദിവസം തന്നെ രണ്ട് തവണ അടയ്ക്കേണ്ടി വന്നു. കുമ്പളം തച്ചംവീട് ശശിയുടെ ഭാര്യ ഷീലയ്ക്കാണ് കെഎസ്ഇബി ഉദ്യോഗസ്ഥരില് നിന്നും കയ്പേറിയ അനുഭവമുണ്ടായത്.
വൈദ്യുതി ബില് അടയ്ക്കേണ്ട സമയപരിധി കഴിഞ്ഞതിന് ഷീലയുടെ വീട്ടിലെത്തിയ ലൈന്മാന് സര്വ്വീസ് വയര് മുറിച്ച് കളയുമെന്ന് പറഞ്ഞു ഭീഷണിപ്പെടുത്തിയാണ് പണം വാങ്ങിയത്. നൂറ്റിനാല് രൂപ ബില് തുക വെളളിയാഴ്ച രാവിലെ പത്തേ കാലോടെ ബന്ധുവിന്റെ കൈവശം കൊടുത്തുവിട്ട് അടച്ചതിന് ശേഷമാണ് ലൈന്മാന് ഇവരുടെ വീട്ടില് പരിശോധനയ്ക്കെത്തിയത്. തുക രാവിലെ തന്നെ അടച്ചിട്ടുണ്ടെന്നും, അടച്ച രസീത് അടയ്ക്കുന്നതിന് പോയിട്ടുള്ള ബന്ധുവിന്റെ കൈവശമാണെന്നും ഷീല ഉദ്യോഗസ്ഥനോട് പറഞ്ഞു. എന്നാല് ഇത് ഓഫീസില് വിളിച്ചു ചോദിച്ച് ഉറപ്പ് വരുത്താന് തയ്യാറാകാതെ ലൈന്മാന് സര്വ്വീസ് വയര് ഇപ്പോള് തന്നെ മുറിച്ചുമാറ്റുമെന്ന് പറഞ്ഞ് ഭയപ്പെടുത്തി 15 രൂപ വാങ്ങി സ്ഥലം വിടുകയായിരുന്നു.
ഓഫീസില് എത്തിയ ലൈന്മാന് വീട്ടമ്മ ഒരു തവണ പണമടച്ചതാണ് എന്ന് ബോധ്യമായിട്ടും, വീട്ടമ്മയില് നിന്നും കൈവശം വാങ്ങിയ തുക തിരികെ നല്കാനോ അതിന് രസീത് നല്കുവാനോ കെഎസ്ഇബി അധികൃതര് തയ്യാറായില്ല. ഇതിനെതിരെ കെഎസ്ഇബി ഉദ്യോഗസ്ഥര്ക്ക് പരാതി നല്കാന് ഒരുങ്ങുകയാണ് ഷീലയുടെ കുടുംബം. എന്നാല് ഇങ്ങനെയൊരു സംഭവം ശ്രദ്ധയില് പെട്ടിട്ടില്ലെന്നും അടുത്ത പ്രവൃത്തി ദിവസം തന്നെ പരിശോധിച്ച് നടപടിയെടുക്കുമെന്നും കെഎസ്ഇബി കുമ്പളം അസിസ്റ്റന്റ് എഞ്ചിനീയര് സുനിത പറഞ്ഞു.
