ചാരുംമൂട്: നൂറനാട് തത്തംമുന്ന ക്ഷീരോല്പാദക സഹകരണ സംഘത്തിലെ കൂടുതല് ക്രമക്കേടുകള് പുറത്തു വന്നു. സംഘത്തിലെ അഴിമതി ജന്മഭൂമി റിപ്പോര്ട്ട് ചെയ്തതിനെ തുടര്ന്ന് മുന്പ്രസിഡന്റ് സോമനും മുന് ഡയറക്ടര് ബോര്ഡ് മെമ്പര് കിടങ്ങില് മുരളിയുമാണ് കൂടുതല് ആരോപണങ്ങളുമായി എത്തിയത്.
നിലവിലെ ഭരണസമിതി അംഗങ്ങളില് താക്കോല് സ്ഥാനത്തിരിക്കുന്ന അംഗങ്ങള് 2011 മുതല് വന്തോതില് അഴിമതി നടത്തി വരുന്നവരാണ്. ഇതിനെതിരെ വകുപ്പുതല അന്വേഷണവും തുടര്ന്ന് സസ്പെന്ഷന് വരെ വാങ്ങിയവര് ഭരണസ്വാധീനം ഉപയോഗിച്ച് വീണ്ടും അധികാരത്തില് തുടരുകയാണ്. കഴിഞ്ഞ വര്ഷം ഇല്ലാത്ത 12 ക്ഷീരകര്ഷകരുടെ പേരില് രണ്ടരലക്ഷം രൂപ കൈക്കലാക്കിയതായും ഇരുവരും ആരോപിച്ചു.
പശുക്കിടാവു പോലും ഇല്ലാത്തവരുടെ പേരില് ദിനംപ്രതി 100 ലിറ്റര് പാല് വരെ അളന്നതായി രേഖകള് കാട്ടിയാണ് തുക കൈക്കലാക്കിയത്.
ആരോപണ വിധേയരായവര് രാഷ്ട്രീയ സ്വാധീനമുള്ളവരാണെന്നും ഇവര്ക്കെതിരെ ശക്തമായ നിയമനടപടികള് സ്വീകരിച്ച് ക്ഷീരകര്ഷകനു കിട്ടാനുള്ള ആനുകൂല്യങ്ങള് അവര്ക്കുതന്നെ കിട്ടുന്നുണ്ടെന്ന് ഉറപ്പു വരുത്തണമെന്നും ഇവര് ആവശ്യപ്പെട്ടു.
നിലവിലുള്ള ഭരണസമിതി പിരിച്ചു വിട്ട് സത്യവും നീതിപൂര്വ്വവുമായ തെരഞ്ഞെടുപ്പ് നടത്തി ഭരണം അവരെ ഏല്പ്പിക്കണമെന്നും വാര്ത്ത സമ്മേളനത്തില് ഇരുവരും ആവശ്യപ്പെട്ടു.
