കാവാലം: പന്തുകളിക്കുന്നതിനിടെ കിണറ്റില്വീണ ഒമ്പതുകാരനെ സാഹസികമായി രക്ഷപ്പെടുത്തിയ 13കാരന് നാടിന്റെ അഭിനന്ദനപ്രവാഹം. കാവാലം കാവുംപടി ഷാജി മുകുന്ദദാസിന്റേയും രജനിയുടേയും മകന് കൈനടി എജെജെഎം എച്ച്എസ്എസിലെ എട്ടാം€ക്ലാസ് വിദ്യാര്ത്ഥി അഭയദാസാണ് മൂന്ന് പതിറ്റാണ്ടിലേറെയായി.
ഉപയോഗ ശൂന്യമായി കിടന്ന മാലിന്യംനിറഞ്ഞ കിണറിന്റെ ആഴങ്ങളിലേക്ക് ആഴ്ന്നുപോയ ബാലനെ ജീവിതത്തിലേക്ക് കൈപിടിച്ച് ഉയര്ത്തിയത്. ജനുവരി 11ന് വൈകിട്ട് 4.30നായിരുന്നു സംഭവം. കാവുംപടി പുത്തന്പറമ്പ് വിപിന്രാജ്-കനകമ്മ ദമ്പതികളുടെ മകന് അമല്മോനാണ് അപകടത്തില്പ്പെട്ടത്.
കൂട്ടുകാരനായ ജിസ്മോനൊപ്പം പന്തുകളിക്കുന്നതിനിടെയാണ് അമല് കാല്വഴുതി കിണറ്റില്വീണത്. ഭയന്നുപോയ ജിസ്മോന് പരിസരവാസികളെ വിളിക്കാന് പോയപ്പോഴാണ് സ്കൂള്വിട്ട് വീട്ടിലേക്ക് വന്ന അഭയദാസ് ബഹളംകേട്ടത്. ഓടിയെത്തി കിണറ്റിലേക്ക് നോക്കിയപ്പോള് മുങ്ങിത്താഴുന്ന അമലിനെക്കണ്ടു. സ്കൂള് ബാഗ് ഊരിമാറ്റി കിണറിന്റെ കുത്തുകല്ലിലൂടെ താഴെയെത്തി അമലിനെ പിടിച്ചുയര്ത്തി മുകളിലേക്ക് കൊണ്ടുവന്നു. ഈ സമയം നാട്ടുകാര് കൂടിയെത്തി ഇരുവരെയും പുറത്തെത്തിച്ച് അമലിന് പ്രഥമ ശുശ്രൂഷ നല്കി.
മാലിന്യം നിറഞ്ഞതും രണ്ടാള് താഴ്ചയോളം വെള്ളമുള്ളതുമായ കിണറ്റിലിറങ്ങി അമലിനെ രക്ഷിക്കാന്കാട്ടിയ സന്മനസിനും ധീരതയ്ക്കും അഭയദാസിന് നാട്ടുകാരുടെയാകെ അഭിനന്ദന പ്രവാഹമാണ്.
കൈനടി എ.ജെ. ജോണ് മെമ്മോറിയല് എച്ച്എസ്എസില് യോഗം ചേര്ന്ന് അഭയദാസിനെ അഭിനന്ദിച്ചു. സ്കൂള് മാനേജര് ഫാ. ജോസഫ് നാല്പതാംകളം, പ്രിന്സിപ്പല് സി.ബി. ജെയിംസ് തുടങ്ങിയവര് പങ്കെടുത്തു. കാവാലം സൂര്യയുവജനക്ഷേമ കേന്ദ്രവും അഭയദാസിന്റെ ധീരതയെ അഭിനന്ദിച്ചു. അഭയദാസിന്റെ അച്ഛന് ഷാജി മുകുന്ദദാസ് ഓട്ടോറിക്ഷാ ഡ്രൈവറാണ്. അനുജന് അക്ഷയ് ഷാജി ആറാം ക്ലാസ് വിദ്യാര്ത്ഥിയാണ്.
