വെള്ളറട: പന്ത്രണ്ടേകാല് ലക്ഷത്തിന്റെ കുഴല്പ്പണവുമായി വന് റാക്കറ്റ് പിടിയില്. ആര്യന്കോട് എസ്ഐ അരുണിന്റെ നേതൃത്വത്തില് ചേനാടില് വാഹനപരിശോധനയ്ക്കിടെയാണ് കുഴല്പ്പണം പിടികൂടിയത്. ഇതുമായി ബന്ധപ്പെട്ട് മൂന്നുപേര് പിടിയിലായി. കോഴിക്കോട് ആസ്ഥാനമാക്കിയാണ് ഈ സംഘം പ്രവര്ത്തിക്കുന്നത്. കോഴിക്കോട് തൊടുവള്ളി മാനിപുരം കുന്നത്തു വീട്ടില് മുഹമ്മദ് ഇല്യാസ് (29), പോറ്റമ്മല് വീട്ടില് നിസ്സാം (23), വയനാട് മൊട്ടില് ചീരന്കുണ്ടില് സജീര് (31) എന്നിവരാണ് പിടിയിലായത്.
സംശയാസ്പദമായി ബൈക്കിലെത്തിയ യുവാവിനെ ചോദ്യം ചെയ്തപ്പോള് പരസ്പരവിരുദ്ധമായ മറുപടി ലഭിച്ചതോടെ പോലീസ് കസ്റ്റഡിയിലെടുത്ത് സ്റ്റേഷനിലെത്തിച്ചു. അവിടെ വച്ച് പരിശോധിച്ചപ്പോഴാണ് കവറില് നിന്ന് പന്ത്രണ്ടേകാല് ലക്ഷം രൂപയുടെ കുഴല്പ്പണം കണ്ടെത്തിയത്. തുടര്ന്ന് നടത്തിയ അന്വേഷണത്തില് ഉള്ളൂരില് ബേക്കറി ജോലിക്കാരെന്ന വ്യാജേന വാടകയ്ക്ക് താമസിക്കുന്ന മൂവര് സംഘത്തിലെ മറ്റുരണ്ടുപേരെ കൂടി പോലീസ് പിടികൂടി. ചോദ്യം ചെയ്യലില് കേരളത്തിലെ വന് കുഴല്പ്പണ റാക്കറ്റിലെ ചെറിയ കണ്ണികളാണ് ഇവരെന്ന് മനസിലായി.
തിരുവനന്തപുരം ജില്ല മുഴുവന് കുഴല്പ്പണം എത്തിക്കുന്നത് ഈ സംഘമാണ്. 10 രൂപ നോട്ടിന്റെ നമ്പര് മെസ്സേജ് ചെയ്യും. ആ നമ്പര് ലഭിക്കുന്ന വ്യക്തി കുഴല്പ്പണവുമായി എത്തി ആ നോട്ടിലെ നമ്പര് ശരിയാണോ എന്ന് പരിശോധിച്ചശേഷം പണം കൈമാറും. ഒരു ദിവസം കേരളത്തിലാകമാനം കോടികളുടെ ബിസിനസാണ് നടക്കുന്നത്. പിടിച്ചെടുത്ത നോട്ടുകളില് 670 ഓളം രണ്ടായിരത്തിന്റെ നോട്ടുകളും 150 ഓളം അഞ്ഞൂറിന്റെ പുതിയ നോട്ടുകളും ബാക്കി നൂറിന്റെ നോട്ടുകളുമാണ് ഉണ്ടായിരുന്നത്. ബാങ്ക് ജീവനക്കാരുടെ ഒത്താശയോടെയാണ് പണമിടപാടെന്ന് പോലീസ് സംശയിക്കുന്നു. കൂടുതല് അന്വേഷണത്തിനായി പിടിച്ചെടുത്ത നോട്ടുകളുടെ നമ്പര് റിസര്വ് ബാങ്കിനു കൈമാറുമെന്ന് പോലീസ് പറഞ്ഞു. കേസ് രഹസ്യമായി ഒതുക്കാന് അന്വേഷണ ഉദ്യോഗസ്ഥര്ക്ക് പ്രതികള് ലക്ഷങ്ങള് വാഗ്ദാനം ചെയ്തതായും പറയപ്പെടുന്നു. ആര്യന്കോട് എസ്ഐ അരുണ്, ടോം ജോസ്, എഎസ്ഐ അനില്കുമാര്, ഷാജി, നാസര്, ജിജു, വിന്ഡോ, സജി എന്നിവരാണ് പ്രതികളെ പിടികൂടിയത്.
