പേരാവൂര്: കാട്ടാനയുടെ ആക്രമണത്തില് ആദിവാസി വയോധികന് കൊല്ലപ്പെട്ടു.അമ്പായത്തോട് താഴെ പാല്ച്ചുരം കോളനിയിലെ ഗോപാലന്(60) ആണ് കൊല്ലപ്പെട്ടത്.
ഇന്നലെ വൈകിട്ട് 4 മണിയോടെ അമ്പായത്തോട്ടെ കൊട്ടിയൂര് വനത്തിലാണ് സംഭവം. ഫയര്ലൈന് വാച്ചറായ ഗോപാലന് ഒരാഴ്ചയോളമായി വനത്തിനുള്ളില് താമസിച്ച് ജോലി ചെയ്ത് വരികയാണ്. വൈകിട്ട് ജോലി കഴിഞ്ഞ് മടങ്ങുന്നതിനിടെ കാട്ടാന അക്രമിക്കുകയായിരുന്നു. കൂടെ ഉണ്ടായിരുന്നവര് ചിതറി ഓടി. അതിനിടയില് ഗോപാലനെ കാട്ടാന ചവിട്ടിയും തുമ്പിക്കൈ കൊണ്ട് തൊഴിച്ചും കൊലപ്പെടുത്തുകയായിരുന്നു എന്നാണ് കരുതുന്നത്.
സംഭവസ്ഥലത്ത് തന്നെ ഗോപാലന് മരിച്ചു. കൊട്ടിയൂര് ഫോറസ്റ്റ് റേഞ്ചര് വി.രതീശന്, ആറളം വൈല്ഡ് ലൈഫ് അസിസ്റ്റന്റ് വാര്ഡന് പി.മധുസൂദനന്, കേളകം എസ്.ഐ ടി.വി പ്രതീഷ് എന്നിവരുടെ നേതൃത്വത്തിലാണ് മൃതദേഹം പുറത്തെത്തിച്ചത്. മൃതദേഹം മാനന്തവാടി ജില്ലാ ആശുപത്രിയിലേക്ക് പോസ്റ്റ്മോര്ട്ടത്തിനായ് കൊണ്ട് പോയി. ഇന്ന് ഉച്ചയോടെ നാട്ടിലെത്തിച്ച് സംസ്കരിക്കും.
സംഭവത്തില് പ്രതിഷേധിച്ച് ഇന്ന് കൊട്ടിയൂര് പഞ്ചായത്തില് രാവിലെ 6 മുതല് വൈകിട്ട് 6 വരെ സര്വ്വകക്ഷി ഹര്ത്താലിന് ആഹ്വാനം ചെയ്തു.
