തിരുവനന്തപുരം : ലോ അക്കാദമി പ്രിന്സിപ്പല് ഡോ.ലക്ഷ്മി നായരുടെ ഡോക്ടറേറ്റിനെ ചൊല്ലി പുതിയ വിവാദം. ലക്ഷ്മിനായരും സഹോദരനും ഡോക്ടറേറ്റ് നേടിയതു അനധികൃതമായാണെന്നാണ് ആക്ഷേപം. ഇക്കാര്യം ഉന്നയിച്ചു ഗവര്ണര്ക്കും വിദ്യാഭ്യാസ മന്ത്രിക്കും പരാതി പോയിട്ടുണ്ട്.
1990 കളില് കേരള സര്വകലാശാല വൈസ്ചാന്സലര് ആയിരുന്ന ജെ.വി.വിളനിലത്തിനെതിരെ വിദ്യാര്ത്ഥി സമരം അതിശക്തമായി തുടരുന്ന കാലത്തു ലക്ഷ്മി നായരുടെ അച്ഛനും ലോ അക്കാദമി ഡയറക്ടറുമായ ഡോ.എന്.നാരായണന് നായര് സിന്ഡിക്കേറ്റ് അംഗമായിരുന്നു. അന്നത്തെ സര്വകലാശാല ഭരണസ്തംഭനം മുതലെടുത്തു നാരായണന് നായര് മക്കള്ക്ക് അനധികൃതമായി ബിരുദവും ബിരുദാനന്തര ബിരുദവും നേടിക്കൊടുത്തു എന്നാണ് ആക്ഷേപം. അന്നു സര്വകലാശാല നിയമ വകുപ്പ് മേധാവിയും ഡീനുമായിരുന്നത് അമ്മാവന് എന്.കെ.ജയകുമാറായിരുന്നു. അച്ഛനും അമ്മാവനും താക്കോല് സ്ഥാനത്തുണ്ടായിരുന്നപ്പോള് ഉത്തരക്കടലാസ് മൂല്യനിര്ണയം നടത്തിയത് അക്കാദമിയിലെ തന്നെ അധ്യാപകരായിരുന്നുവത്രേ. ഈ വിവരങ്ങള് പുറത്തുവന്നതോടെയാണ് ലക്ഷ്മി നായരുടെ ഡോക്ടറേറ്റും സംശയത്തിന്റെ നിഴലിലായത്.
