പയ്യന്നൂര്: ചെറുതാഴം പഞ്ചായത്തിലെ പ്രധാന പാടശേഖരമായ അറത്തില് വയലില് പുഞ്ചകൃഷി വ്യാപകമായി നശിക്കുന്നു. വയലിന് നടുവിലൂടെയുള്ള അറത്തില് വയല് തോട് വററി പാടം വരണ്ടതോടെ കൃഷിയാകെ ഉണങ്ങുകയാണ്. പിലാത്തറക്കടുത്ത് നിന്ന് നീരുറവ തുടങ്ങി പഴിച്ചയില്, ഭദ്ര പുരംതാഴെ, അറത്തില്, പട്ടേരി താഴെ, പോറ്റി താഴെ, കോട്ടയില് വയലുകളിലൂടെ ഒഴുകി വണ്ണാത്തിപ്പുഴയില് ചേരുന്ന തോടാണിത്. കടുത്ത വേനലില് വരെ വറ്റാത്ത നാലു കിലോമീറ്റര് നീളമുള്ള പ്രകൃതിയുടെ വരദാനമായ ഈ ജലസ്രോതസ് ഇപ്പോള് നീരൊഴുക്ക് നിലച്ച് വററിവരണ്ട നിലയിലായി. ഇത് വയലാകെ കടുത്ത വരള്ച്ചക്ക് ഇടയാക്കി.
നൂറ്റമ്പത് ഏക്രയോളം വ്യാപിച്ചുകിടക്കുന്ന ഈ വയലില് രണ്ടാം വിള പുഞ്ചകൃഷിയാണ് വിളഞ്ഞും വിളയാറായ നിലയിലും നശിക്കുന്നത്. പഴിച്ചയില് ഭാഗത്ത് കൃഷിയാകെ ഉണങ്ങി ഉപേക്ഷിച്ച നിലയിലാണ്. മിക്കയിടത്തും നെല്ചെടികള് വെയില് ചൂടില് പഴുത്തുപോയി. വിരിഞ്ഞ നെല് കതിരുകള് ചായി ആയ അവസ്ഥയിലാണെന്ന് കര്ഷകര് വിലപിക്കുന്നു.
പാടമാകെ കൂടുതല് വരളുമ്പോള് ശേഷിക്കുന്ന നെല്ലാകെ ഉണങ്ങി കരിയുന്ന നിലയിലേക്ക് നീങ്ങുകയാണ്. ഇങ്ങനെ പോയാല് കന്നുകാലികള്ക്കുള്ള വൈക്കോല് വരെ പുഞ്ചകൃഷിയില് ലഭിക്കില്ലെന്ന സ്ഥിതിയിലാണ് കര്ഷകര്.
