നെയ്യാറ്റിന്കര: നെയ്യാറ്റിന്കര ജനറല് ആശുപത്രിയില് സിപിഎം ഗുണ്ടകളുടെ അഴിഞ്ഞാട്ടം. ചികിത്സയ്ക്കെത്തിയെ ആര്എസ്എസ് പ്രവര്ത്തകരെ ഡോക്ടറുടെ മുന്നിലിട്ട് വെട്ടി. മൂന്ന് ആര്എസ്എസുകാര്ക്ക് പരിക്ക്. നെയ്യാറ്റിന്കര വഴുതൂര് സ്വദേശികളായ മണികണ്ഠന്(31), രാജേഷ്(26), വിഷ്ണു(25) എന്നിവര്ക്കാണ് മാരകമായി പരിക്കേറ്റത്.
ഇന്നലെ വൈകീട്ട് ഏഴുമുപ്പതോടെയാണ് സംഭവം. കുറേ കാലങ്ങളായി നെയ്യാറ്റിന്കര റെയില്വേ സ്റ്റേഷനും വഴുതൂരും കേന്ദ്രീകരിച്ച് കഞ്ചാവ് മയക്കുമരുന്ന് തുടങ്ങി ലഹരി വില്പന സ്ഥലത്തെ സിപിഎം പ്രവര്ത്തരുടെ നേതൃത്വത്തില് നടന്ന് വരികയാണ്. ഇത് ചോദ്യം ചെയ്യുകയും പോലീസില് അറിയിക്കുകയും ചെയ്തതിന്റെ പ്രതികാരമായി വീട്ടില് നിന്ന് നെയ്യാറ്റിന്കരയിലേക്ക് വരികയായിരുന്ന ആര്എസ്എസ് പ്രവര്ത്തകരായ മണികണ്ഠനെയും രാജേഷിനെയും വഴുതൂരിന് സമീപം സിപിഎം ഗുണ്ടകള് തടഞ്ഞു. ബൈക്കില് നിന്നു തള്ളി നിലത്തിട്ട് ക്രൂരമായി മര്ദ്ദിച്ചു. മാരക മര്ദ്ദനത്തില് നിന്ന് ഓടി രക്ഷപ്പെട്ട ഇരുവരും സുഹൃത്ത് വിഷ്ണുവിനെയും കൂട്ടി നെയ്യാറ്റിന്കര ജനറല്ആശുപത്രിയില് ചികിത്സ തേടിയെത്തി.
സിപിഎം ഗുണ്ടകളായ വിഷ്ണു, വിപിന്, ആനയറ ബസ്റ്റോപ്പിലിട്ട് യുവാവിനെ വെട്ടിക്കൊലപ്പെടുത്തിയ കേസിലെ പ്രതികളായ പപ്പു, ഹരീഷ്, രഞ്ചു എന്നിവരുടെ നേതൃത്വത്തിലെത്തിയ മുപ്പതോളം സിപിഎം ക്രിമിനലുകള് ഡ്യൂട്ടി ഡോക്ടര് പ്രശാന്തിന്റെ മുന്നില് വച്ച് ആര്എസ്എസ് പ്രവര്ത്തകരെ ആക്രമിച്ചു. മാരകായുധങ്ങളുപയോഗിച്ച് വെട്ടിപ്പരിക്കേല്പ്പിക്കുകയായിരുന്നു. ആശുപത്രിയിലെ ട്യൂബ്, കസേരകള് എന്നിവ സിപിഎം സംഘം തല്ലിപൊട്ടിച്ചു. തടയാന് ശ്രമിച്ച ഡോക്ടര്ക്ക് നേരെ അക്രമികള് തിരിഞ്ഞു. ഭയന്ന ഡോക്ടര് ഡ്യൂട്ടിറൂമില് നിന്ന് പ്രാണരക്ഷാര്ഥം ഇറങ്ങി ഓടി. ആശുപത്രിയില് ഭീകരാന്തരീക്ഷം സൃഷ്ടിച്ച സിപിഎം ക്രിമിനലുകള് ചികിത്സയ്ക്കെത്തിയ രോഗികളെയും കൂട്ടിരിപ്പുകാരെയും ഭീഷണിപ്പെടുത്തി.
ആശുപത്രി അധികൃതര് അറിയിച്ചതനുസരിച്ച് പോലീസെത്തുമ്പോഴേക്കും പ്രതികള് രക്ഷപ്പെട്ടു. രക്ഷപ്പെടുന്നതിനിടയില് നാട്ടുകാര് പിന്തുടര്ന്ന് ഒരാളെ പിടികൂടി. ഇത്രയും സംഭവങ്ങള് നടന്ന് മണിക്കൂറുകള് കഴിഞ്ഞിട്ടും തൊട്ടടുത്ത റൂമിലുണ്ടായിരുന്ന ആശുപത്രി സൂപ്രണ്ട് സ്ഥലത്തെത്തുകയോ നടപടി സ്വീകരിക്കുകയോ ചെയ്തില്ല. പോലീസും ആശുപത്രി അധികൃതരും പ്രതികളെ സംരക്ഷിക്കാനായി കേസ് വഴിതിരിച്ചു വിടാന് ശ്രമിക്കുന്നതായി ബിജെപി ആരോപിച്ചു. ബിജെപി മണ്ഡലം പ്രസിഡന്റ് സുരേഷ് തമ്പി, വൈസ് പ്രസിഡന്റ് മഞ്ചന്തല സുരേഷ്, ജനറല്സെക്രട്ടറി അഡ്വ പൂഴിക്കുന്നു സുരേഷ്, കൗണ്സിലര്മാരായ നിലമേല് ഹരി, അഡ്വ സ്വപ്നജിത്ത് എന്നിവര് സ്ഥലത്തെത്തി പോലീസ് ഉദ്യോഗസ്ഥരുമായി സംസാരിച്ചു. പരിക്ക് ഗുരുതരമായതിനാല് വിഷ്ണുവിനെയും രാജേഷിനെയും മെഡിക്കല് കോളേജിലേക്ക് മാറ്റി.
