ആര്യനാട്: മൃഗവേട്ടയെക്കുറിച്ച് വിവരം നല്കിയ ആദിവാസിയെ നടുറോഡിലിട്ട് മര്ദ്ദിച്ചു. മീനാങ്കല് പൊടിയക്കാല അര്ച്ചന ഭവനില് വിജയന് കാണി (47) യെ ആണ് ഞായറാഴ്ച രാത്രി 7 ന് തല്ലിചതച്ചത്.
വിജയനെ മൃഗീയമായി മര്ദ്ദിച്ച മീനാങ്കല് സ്വദേശി ബാബുവിനെതിരെ ബന്ധുക്കള് വിതുര പോലീസ് സ്റ്റേഷനില് പരാതി നല്കി. വിജയന് താമസിക്കുന്നത് തങ്ങളുടെ സ്റ്റേഷന് പരിധിയിലാണെങ്കിലും മര്ദ്ദനമേറ്റത് ആര്യനാട് സ്റ്റേഷന് പരിധിയിലായതിനാല് കേസെടുക്കാന് വിതുര പോലീസ് കൂട്ടാക്കിയില്ല. തുടര്ന്ന് ബന്ധുക്കള് ആര്യനാട് സിഐയ്ക്കും എസ്ഐക്കും പരാതി നല്കുകയായിരുന്നു.
വനത്തിനുള്ളില് നടക്കുന്ന മൃഗവേട്ടയെ കുറിച്ച് വിജയന് വനം വകുപ്പ് ഉദ്ധ്യോഗസ്ഥര്ക്ക് രഹസ്യ വിവരം നല്കിയിരുന്നു. ഇതാണ് ബാബുവിനെ പ്രകോപിപ്പിച്ചതെന്ന് വിജയനും ബന്ധുക്കളും പറയുന്നു. ഞായറാഴ്ച രാത്രി 7 ന് കടയില് നിന്ന് സാധനങ്ങള് വാങ്ങി വീട്ടിലേക്ക് മടങ്ങുമ്പോഴാണ് ബാബു വിജയനെ തടഞ്ഞുവച്ച് മര്ദ്ദിച്ചത്. തലയ്ക്കും അടിവയറിനും പരിക്കേറ്റ് ബോധരഹിതനായി റോഡില് കിടന്ന വിജയനെ നാട്ടുകാര് നെടുമങ്ങാട് താലൂക്ക് ആശുപത്രിയില് പ്രവേശിപ്പിച്ചു. പരിക്കുകള് ഗുരുതരമായതിനാല് രാത്രിയോടെ മെഡിക്കല് കോളേജ് ആശുപത്രിയിലേക്ക് മാറ്റി.
ജാതിപ്പേരുവിളിച്ച് ആക്ഷേപിക്കുകയും വധ ഭീഷണി മുഴക്കി ക്രൂരമായി മര്ദ്ദിക്കുകയും ചെയ്തുവെന്ന് വിജയന് പോലീസിന് നല്കിയ പരാതിയില് പറയുന്നു. എന്നാല് നിസാര വകുപ്പുകള് ചുമത്തി കേസെടുത്ത് പോലീസ് പ്രതികളെ രക്ഷപ്പെടുത്തുകയാണെന്ന് ആദിവാസി മഹാസഭ ആരോപിക്കുന്നു. ഉന്നത രാഷ്ട്രീയ നേതാക്കളുടെ സമ്മര്ദത്തിന് വഴങ്ങിയാണ് പോലീസ് സംഭവത്തെ നിസാരവത്ക്കരിക്കുന്നതെന്ന് ആക്ഷേപമുണ്ട്.
വിതുര, മീനാങ്കല് ട്രൈബല് ഏര്യകള് കേന്ദ്രീകരിച്ച് നായാട്ടും കള്ളത്തടി വെട്ടും വ്യാപകമാണെന്ന് പരാതികളുണ്ട്. വനത്തിനുള്ളില് നടക്കുന്ന ഇത്തരം പ്രവര്ത്തികളെ എതിര്ക്കുകയും വനം വകുപ്പിന് വിവരം നല്കുകയും ചെയ്യുന്ന ആദിവാസികളെ നാട്ടിലെത്തുമ്പോള് മര്ദ്ദിക്കുകയും ഭീഷണിപ്പെടുത്തുകയും പതിവാണ്.
ആദിവാസിക്ക് നേരെയുണ്ടായ ആക്രമണത്തെ ഒതുക്കിതീര്ക്കാന് ചില കോണുകളില് നിന്ന് സമ്മര്ദമുയരുന്നതായി ആദിവാസി മഹാസഭ പ്രസിഡന്റ് മോഹന് ത്രിവേണി ആരോപിച്ചു.
