കാണ്പൂര്: ഇന്ത്യയുടെ ട്വന്റി20 നായകനായി വിരാട് കോഹ്ലിക്ക് ഇന്ന് അരങ്ങേറ്റം, അതും പത്മശ്രീയുടെ നിറവില്. റിപ്പബ്ലിക്ക് ദിനത്തലേന്ന് പത്മശ്രീ പ്രഖ്യാപിച്ചവരുടെ കൂട്ടത്തില് വിരാടുമുണ്ട്. റിപ്പബ്ലിക്ക് ദിനത്തിലെ നായക അരങ്ങേറ്റം ആഘോഷമാക്കാന്, രാജ്യത്തിന് മികച്ച സമ്മാനം നല്കാന് ഇതില്പ്പരം മികച്ച അവസരം ലഭിക്കില്ല. ഐപിഎല്ലില് ബാംഗ്ലൂര് റോയല് ചലഞ്ചേഴ്സിനെ നയിച്ചതിന്റെ അനുഭവസമ്പത്തുമായാണ് വിരാട് കാണ്പൂരില് ട്വന്റി20യുടെ ആവേശത്തിലേക്കിറങ്ങുന്നത്. വൈകിട്ട് നാലരയ്ക്ക് പോരാട്ടം.
ടെസ്റ്റ്, ഏകദിന പരമ്പരകള് നേടിയതിന്റെ ആവേശത്തില് ഇന്ത്യ എത്തുന്നു. എന്നാല്, കൊല്ക്കത്തയിലെ അവസാന ഏകദിനം ആവേശകരമായ പോരാട്ടത്തില് സ്വന്തമാക്കിയ ഇംഗ്ലണ്ടിന് അതേ പോരാട്ടവീര്യം തുടരണം. ട്വന്റി20യില് ഏറെ മികച്ച ടീമാണ് ഇംഗ്ലണ്ട്. യുവതാരങ്ങളുടെയും പരിചയസമ്പന്നരുടെയും മിശ്രണമാണ് ഇന്ത്യന് ടീം.
ഏകദിന പരമ്പരയില് ടീമിലില്ലാതിരുന്ന ഋഷഭ് പന്ത്, മന്ദീപ് സിങ്, യുസ്വേന്ദ്ര ചഹല്, പര്വേസ് റസൂല്, സുരേഷ് റെയ്ന, ആശിഷ് നെഹ്റ എന്നിവര് ട്വന്റി20 ടീമിലുണ്ട്. അശ്വിനെയും രവീന്ദ്ര ജഡേജയെയും ഒഴിവാക്കിയപ്പോഴാണ് പര്വേസ് റസൂല് ടീമിലെത്തിയത്, ഒപ്പം അമിത് മിശ്രയും.
വിരാട്, സുരേഷ് റെയ്ന, യുവരാജ് സിങ്, എം.എസ്. ധോണി എന്നിവര് ആദ്യ ഇലവനില് ഉറപ്പ്. കെ.എല്. രാഹുല്, മന്ദീപ് സിങ്, ഋഷഭ് പന്ത് എന്നിവരിലൊരാള് ഓപ്പണറുടെ റോളിലെത്തും. രണ്ടാം ഓപ്പണറായി നായകന് തന്നെ എത്താന് സാധ്യത. ടീമിന്റെ ഘടന നിലനിര്ത്താന് ഓപ്പണറാകണമെങ്കില് അതിനു തയാറെന്ന് വിരാട് വ്യക്തമാക്കിയിട്ടുണ്ട്. അങ്ങനെയെങ്കില് റെയ്ന, യുവരാജ്, ധോണി, മനീഷ് പാണ്ഡെ എന്നിവര് പിന്നാലെയെത്തും.
ഓള്റൗണ്ടറായി ഹാര്ദിക് പാണ്ഡ്യ. പര്വേസ് റസൂല്, അമിത് മിശ്ര, ആശിഷ് നെഹ്റ എന്നിവര് ബൗളിങ് വിഭാഗത്തില്. ഭുവനേശ്വര് കുമാര്, ജസ്പ്രീത് ബുംറ എന്നിവരിലൊരാളും ഇടംകാണും.
അതേസമയം, ലെഗ് സ്പിന്നര് യുസ്വേന്ദ്ര ചഹലിനെയും പരിഗണിക്കുന്നു. മുന്നിരക്കാരുടെ അഭാവത്തില് ചഹലിനും റസൂലിനും ഋഷഭിനും മന്ദീപിനും കഴിവു തെളിയിക്കാനുള്ള അവസരമെന്ന് മത്സരത്തലേന്നത്തെ വാര്ത്താസമ്മേളനത്തില് വിരാട് പറഞ്ഞതില് എല്ലാമുണ്ട്.
പരിക്കില് നിന്ന് മുക്തനായി ജോ റൂട്ട് തിരിച്ചെത്തുന്നതാണ് ഇംഗ്ലണ്ടിന്റെ ശക്തി. ഈഡനില് അവസാന ഓവര് മികച്ച രീതിയില് എറിഞ്ഞ് ജയം നല്കിയ ക്രിസ് വോക്സിന്റെ പ്രകടനവും ടീമിന് ആവേശം പകരുന്നു. എന്നാല്, വോക്സിനു പകരം ക്രിസ് ജോര്ദനാണ് ടീമിലുള്ളത്. സാം ബില്ലിങ്സും ജേസണ് റോയിയും ഓപ്പണ് ചെയ്യും. റൂട്ട്, നായകന് ഇയാന് മോര്ഗന്, ബട്ലര്, സ്റ്റോക്സ്, മോയിന് അലി, പ്ലങ്കറ്റ് തുടങ്ങിയവരും ടീമിന്റെ കരുത്ത്.
റണ് പിന്തുടരുമ്പോള് വിരാട് അര്ധസെഞ്ചുറിക്കപ്പുറം നേടിയിട്ടും ഇന്ത്യ അവസാനമായി തോറ്റത് ഇംഗ്ലണ്ടിനോട്, 2014ല് എഡ്ജ്ബാസ്റ്റണില്. അതിനു ശേഷം നാലു തവണ വിരാട് അര്ധ സെഞ്ചുറി കടന്നപ്പോഴൊക്കെ ഇന്ത്യ പിന്തുടര്ന്ന് ജയിച്ചു. ചെറിയ ഗ്രൗണ്ടും ബാറ്റിങ്ങിന് അനുകൂലമായ പിച്ചുമാണ് കാണ്പൂരിലേത്. റണ്ണൊഴുകുമെന്ന് പ്രതീക്ഷ.
ടീം ഇവരില് നിന്ന്: ഇന്ത്യ- വിരാട് കോഹ്ലി (നായകന്), ജസ്പ്രീത് ബുംറ, യുസ്വേന്ദ്ര ചഹല്, എം.എസ്. ധോണി, ഭുവനേശ്വര് കുമാര്, മന്ദീപ് സിങ്, അമിത് മിശ്ര, ആശിഷ് നെഹ്റ, മനീഷ് പാണ്ഡെ, ഹാര്ദിക് പാണ്ഡ്യ, ഋഷഭ് പന്ത്, പര്വേസ് റസൂല്, കെ.എല്. രാഹുല്, യുവരാജ് സിങ്, സുരേഷ് റെയ്ന.
ഇംഗ്ലണ്ട് – ഇയാന് മോര്ഗന് (നായകന്), മോയിന് അലി, ജേക്ക് ബാള്, സാം ബില്ലിങ്സ്, ജോസ് ബട്ലര്, ലിയാം ഡ്വാസണ്, ജോണി ബെയര്സ്റ്റൗ, ക്രിസ് ജോര്ദാന്, ടൈമല് മില്സ്, ലിയാം പ്ലങ്കറ്റ്, ആദില് റഷീദ്, ജോ റൂട്ട്, ജേസണ് റോയി, ബെന് സ്റ്റോക്സ്, ഡേവിഡ് വില്ലി.
