മത്സരിച്ച രണ്ടിനങ്ങളിലും ഒന്നാം സ്ഥാനം നേടി ജയഗീത. പ്രശസ്ത കവി രമേശന് നായരുടെ തങ്കവല്ല്യമ്മ എന്ന കവിത പാടിയാണ് കലോത്സവത്തിലെ കവിതാലാപന മത്സരത്തില് ഒന്നാം സ്ഥാനം കരസ്ഥമാക്കിയത്.
സംസ്കൃതോത്സവം ഹൈസ്കൂള് കുട്ടികളുടെ വിഭാഗം ഗാനാലാപനത്തിലായിരുന്നു കഴിഞ്ഞ ദിവസം ഒന്നാം സ്ഥാനം നേടിയത്. പട്ടാമ്പി സംസ്കൃത കോളേജിലെ അദ്ധ്യാപകന് സത്യന് മാഷ് രചിച്ച് ശിവരാമന് നാഗലശ്ശേരി സംഗീതം നല്കിയ ‘ശാലീന സുന്ദരീ’ എന്ന ഗീതം പാടിയായിരുന്നു ഒന്നാം സ്ഥാനം നേടിയത്.
മലയാള കവിതാ മത്സരങ്ങളില് പതിവായി കേള്ക്കാറുളള കവിതകളില് നിന്നും വിത്യസ്തമായി പ്രശസ്ത കവി രമേശന് നായരുടെ കവിത ആലപിച്ച് നേടിയ നേട്ടം കലോത്സവ വേദിയില് ശ്രദ്ധിക്കപ്പെട്ടു . മലയാളത്തിലെ പ്രമുഖ കവികളായ സച്ചിദാനന്ദന്റെയും വയലാറിന്റേയും കവിതകള് ആലപിച്ചവരെ പിന്നിലാക്കിയാണ് ജയഗീത ഈ നേട്ടം കൈവരിച്ചത്. ആദ്യമായാണ് സംസ്ഥാന സ്ക്കൂള് കലോത്സവത്തില് പങ്കെടുക്കുന്നത്. ആദ്യമായി പങ്കെടുത്ത രണ്ട് ഇനങ്ങളിലും വിജയം കൈവരിക്കുകയായിരുന്നു.
പാലക്കാട് പട്ടാമ്പി സിജിഎം ഹയര്സെക്കണ്ടറി സ്കൂളില് പത്താം ക്ലാസ് വിദ്യാര്ത്ഥിനിയാണ് ജയഗീത. വാടാനാം കുറിശ്ശി ഹൈസ്കൂള് ഹിന്ദി അദ്ധ്യാപിക കുമാരി ഗീതയുടേയും ജന്മഭൂമി ഡെപ്യൂട്ടി എഡിറ്റര് കാവാലം ശശികുമാറിന്റെയും മകളാണ്.
